SHILLONG: Meghalaya a·doko ma·mong sorkarini Labour & Employment Ministry, Labour hospital-ko kulina miksongenga aro iana a·dok sorkarini a·a sandie on·aniko sengengkua ine u·iataha.
Iako Mongolbar salo, Petroleum & Natural Gas baksana Labour & Employment-ni Union Minister of State Rameshwari Teli parakataha.
Teli-ni parakatani gitade, gipin biaprango gitan Meghalaya a·dokoba hajira kam ka·e cha·enggipa manderang bang·en dongani gimin uni ministry, komibeoba ge 50 palang donggipa hospital-ko labour-rangna rike on·na miksongenga.
Indake ong·genchimoba, Union Minister-ni parakatani gitade, uamang Shillong-osa ia hospital-ko kulina miksongengoba Shillong songjinmaode ia hospital-na a·ako man·janaba gnang aro songjinmani a·palosa biapko on·skana man·aigen ine a·dok sorkari, uamangna u·iatskaahachim.
“Labour hospital-ko Shillong songjinmao rikna gita a·ako on·china Labour Ministry, a·dok sorkariko aganahachim indiba Shillong songjinmaode a·ako man·jawa aro songjinmani a·palosa hospital-ko rikna man·aigen ine a·dok sorkari chingna u·iataha,” ine Teli parakataha.
Hospital-ko rikna gita a·dok sorkari a·ako on·ahaode pilak nanga dakchakanirangko ma·mong sorkarian on·aignokchim ineba Union Minister parakataha.
