SHILLONG: Meghalaya Legislative Assembly-o Khasi aro Garo ku·sikrangkoba jakkalna on·na gita sorkarini ja·ku de·aniko Nationalist Congress Party (NCP)-ni state president aro Gambegre-ni MLA Saleng A Sangma jegalatenba, ian a·doko songdongenggipa Tribal jatrangni gisepo ma·sisretgrikaniko ra·baani gita ong·gen ine parakataha.
Da·o dipet Khasi aro Garo ku·sikrangko Assembly-o jakkalna on·na gita ja·ku de·ani somoirang ong·kujaenga ine janapatengon, Khasi aro Garo ku·sikrangko Eighth Schedule-o ra·gatna gitasa a·dok sorkari gisik on·e kamko ka·na nangenga ine Sangma parakataha.
“Angni chanchiani gitade, da·o dipet Assembly-o Khasi aro Garo ku·sikrangko jakkalna on·na gita ja·ku de·ani ong·kujaenga indiba Khasi aro Garo ku·sikrangko Eighth Schedule-o ra·gatna gitasa a·dok sorkari krenge kamko ka·na nangenga,” ine NCP-ni state president, kobor ra·timgiparangna aganaha.
Da·o dipet a·dok gimikni nanganirangna ku·rangko on·na gita Meghalaya Students Union gita dakgipa dolrang dongkuja ine janapatengon, Meghalaya a·doko English ku·sikko jakkalanichisa a·doko songdongenggipa pilak jatrangkon nangrimatenga ine Sangma parakataha.
Sangma-ni parakatani gitade, dingtang dingtang dolrangan da·o dipet joltangtango nanganirangnasan ku·rangko on·engpiti.
Khasi-Jaintia Hills a·jani chatro chatrirangko Garo ku·sikko skie ra·china aro Garo Hills-ni chatro chatrirangko Khasi-Jaintia ku·sikrangko skie ra·china didina nangenga ineba Gambegre-ni MLA aganaha.
MLA-rangko ku·tangtangchi aganna on·na gita da·o dipet Chief Minister baksa chanchirima dongkuja ineba Sangma parakataha.