SGH-o wata chengani training program-ko a·bachengata

BAGHMARA: South Garo Hills a·jao Meghalaya Skill Development Society-ni dakchakanichi jasa atana wa·ani bosturangko watna chengna gita skie on·enggipa training program-ko Budbar salo, Garo Hills Autonomous District Council (GHADC)-ni Chairman aro Gasuapara-ni MDC Sengchim N Sangma, Baghmara-o a·bachengate on·angaha.
Ia training program-ko a·bachengate on·anganio GHADC-ni Chairman, jinmana aganprakengon, jolo songdongenggipa manderangni namgnina ia training program-ko ong·atengani gimin an·tangni mittelpilaniko parakangenba, wa·aoniko dingtang dingtang bosturang tarina man·a aro ia bosturangko tarie manderang, an·tangtangna janggi tangani cholrangko dake ra·na man·gen ine parakangaha.
An·tangtangni changa sapanirangko jakkalchina gita ia training program-o skie ra·giparangko didiangengon, wata chenganiko skie ra·anichi an·tangtangnasan ong·aigija gipinrangnaba kam ka·e cha·ani cholrangko ong·katatna man·gen ine Sangma parakataha.
Prime Minister Employment Generation Program (PMEGP)-ni ning·o certificate donggipa manderangna chonchongipa karkanarangko kulina tangka paisarangko dakchake on·enga ine talataniko on·angengon, ia training program-o skie ra·enba loan-rangko ra·e an·tangtangni karkanarangko kuliskana man·gen ine Sangma parakataha.
An·tangtangni kamo chu·sokgiparang ong·na gita kamtangtango gisik nanggiparang ong·china gitaba GHADC-ni Chairman didiangaha.
Ia program-ko ong·atanio dongpae jinmana aganprakanggipa gipin manderangara, Meghalaya Skill Development Society-ni SDO Mithen R Marak, NILC-ni Director Joseph Ch Marak, Deku Parish-ni Pamong Fr Daniel Sangma aro gipinrang ong·a.