SHILLONG: HNLC bobil dolni gitcham general secretary Cheristerfield Thangkhiew-ko police-rangni so·otgalgipani bidingo Justice (Retd) T Vaiphei-ni judicial inquiry dakani report-ko antichetmangna skangan on·manahaoba ia report-ko a·dok sorkari, jinmana parakkujaenga.
Ia report-ko jinmana parakkujaengani gimin talataniko on·angengon, ia inquiry report-ko Justice Vaiphei, May 20 tarikon sorkarina on·ahachim indiba ia report namen bakroani a·sel report-ko nipilna somoi nangkuenga ine a·dokni Chief Minister Conrad K Sangma parakataha.
Ia report-ko sorkari nia matchotahaon ia report-o seanirangko jinmana parakatgen ineba Chief Minister parakataha.
Indake ong·engon, ia report-ko ta·raken jinmana parakatchina gita saksa ukil Erwin K Sutnga, a·dok sorkario dabiangskaaha.
Iani bidingo kobor ra·timgipa manderang baksa agangrikengon, inquiry report-o police-rangni ong·gija kamrangko parakahani giminsa sorkari, ia report-ko jinmana parakkujaengakon ine Sutnga, an·tangni chanchichipenganiko parakataha.
“Manderang iani bidingo ma·sie ra·na bil donga. Je police officer-rangan ia kamo jak dongachim, pilakkon kakket bichalona ra·bana nanga,” ine Sutnga aganaha.
Police-rangni dos donganiko ma·siatna sikjaengani giminsa sorkari ia report-ni bidingo jinmana parakkujaenga ine so·ota man·gipa HNLC-ni gitcham general secretary Thangkhiew-ni ma·drangba parakataha.
Re·anggipa 2021 bilsini August 13 tariko HNLC-ni gitcham dilgipako police-rangni so·ote galani ja·man Shillong songjinmao ding·chaoanirang ong·katahani gimin ia a·selni bidingo judicial inquiry-ko dakchina Meghalaya sorkari ge·etangahachim.
HNLC-ni gitcham general secretary Cheristerfield Thangkhiew-ko 2021 bilsini August 13 tarik pringwalo, uni dongchakenggipa nokona re·ange police-rang so·otahachim ine nikna man·a.
Police-rangni u·iatani gitade, re·anggipa bilsio Shillong songjinmani Laitumkhrah-o IED bomako gopretanio jak dongani gimin police-rang uko rim·nasa uni nokona re·angahachim indiba ua police-rangko churichi chadrappangpilna jotton ka·ahani giminsa police-rang uko gochakna nangahachim.
Indake ong·genchimoba police-rangni agangipa kattarangko dingtang dingtang dolrang bebera·na man·jae, iani bidingo inquiry-ko dakchina sorkario dabiskaahachim.