TURA: Agia-Medhipara-Phulbari-Tura (AMPT) rama namsrangjahani a·sel ia ramako re·ruraenggipa aro jolo songdongenggipa manderang neng·nikanirangko chagrongna nangtokengon, ia ramako tarina tender on·ani kamrang a·bachengaha aro ia jani gisepon matchotnaba dongaha ine West Garo Hills a·jani Deputy Commissioner Swapnil Tembe parakataha.
Ia km 140 ong·gipa rama Tura-oni a·bachenge Assam a·dokni simao donggipa sign board-o bon·eachim. Ia ramara Assam a·dokni Mankachar, Hatsingimari jolrang baksa Meghalaya a·dokni Tura, Phulbari aro Tikrikilla jolrangko nangdimeatgipa rama ong·e, ia rama gita salantian lakni lak manderang, ia rama gitan songre songgabattokengachim.
Ia ramasa Assam aro Garo Hills-ni manderangna namen mongsonggipa rama ong·genchimoba, ia ramani obosta namen namsrangjahani a·sel, ia rama gita songre songgabatenggipa manderangsan ong·aigija ia ramani samtangtango songdong a·chaenggipa manderangba neng·nikanirangko chagrongna nangtokengachim.
Indake ong·engon, ia ramako tarina gita tender on·ani kamko a·bachengatmanaha aro tender on·ani kamko ia jani bon·angachibara matchotahaode rama tariani kamko bakan a·bachengna man·aba dongaha ine West Garo Hills a·jani Deputy Commissioner parakataha.
Da·o dipet ia ramao Tura-oni Garobadha-onade manderang altuaen re·rurana man·enga aro Sign Board donggipaoni Nidanpur-onaba ramako tariengaha ine koborko on·aha.
Kobor on·timgiparangni u·iatani gitade, Gongglanggre-oni Tikrikilla-ona dakanggipa ia ramani bakrang obosta namsrangjahani a·sel ia rama gita songre songgabatenggipa manderang neng·nikanirangko chagrongna nangtokengachim.