SHILLONG: Tom·tomaniona re·bapilna gita sorkari baksa agangrikanio Hynniewtrep National Liberation Council (HNLC) bobil dolni dilgiparang, naljoke re·rurana man·na gita HNLC, ma·mong sorkari aro a·dok sorkari, songgigrikaniko dakangaha ine kobor on·aha.
Iani bidingo talataniko on·angengon, batanggimin jagittamni gisepo HNLC-ni executive committee, changgittamna kingking a·dok sorkari ku·baltitimgipa PS Dkhar baksa agangrikna man·aha ine HNLC bobil dolni pal agangrikna songako man·gipa Sadon Blah, Mongolbar salo parakataha.
“Chinga changgittamna kingking sorkarini ku·baltitimgipa baksa agangrikna man·aha aro iani gisepon, HNLC bobil dolni dilgiparang, naljokani gnang re·rurae sorkari baksa agangrikna man·na gita Meghalaya a·dok ning·o naljokgipa ramako on·na tik ka·angaha,” ine Blah parakataha.
HNLC-ni ku·baltitimgipa Sadon Blah-ni parakatani gitade, da·o HNLC-ni dilgiparangna naljokgipa ramako on·na tik ka·ahani gimin da·o adita antirangni gisepon HNLC bobil dolni dilgiparang, sorkari baksa agangrikaniko a·bachenggnok ine ka·dongsona man·enga.
HNLC-ni dilgiparang, a·dok sorkari ba ma·mong sorkari baksa agangrikna man·na gitasa ia naljokgipa ramako on·na tik ka·aha ine talataniko on·angengon, HNLC-ni dilgiparangna naljokgipa ramako on·aniara, ia tom·tomaniko ra·bana kam ka·aniko ta·rakbatatani gita ong·gen ine Blah parakataha.
HNLC aro sorkarini gisepo ‘ceasefire’-na songgigrikani giminde ua mamingkoba aganna jechakskaaha.
HNLC-ni dilgiparang, a·dok aro ma·mong sorkariko gronge, an·tangtangni chanchianirangko aganani ja·mansa ceasefire-na songgigrikanide ong·ainaba gnang ineba ua aganaha.
HNLC) bobil dolni sorkari baksa agangrikaniko a·bachengatna man·na gita sorkarini songe on·gipa ku·baltitimgiparang baksa agangrikna Hynniewtrep National Youth Front (HNYF)-ni president Sadon Blah-ko HNLC-ni dilgiparang seokahachim.
HNLC bobil dol baksa agangrikaniko a·bachengatna gita a·dok sorkari, gitcham IAS officer Peter S Dkhar-ko aro ma·mong sorkarini gitaba MDA-ni Advisor AK Mishra-ko ku·baltitimgipani kamna seokskaahachim ine nikna man·a.
