TURA: Agia-Medhipara-Phulbari-Tura (AMPT) ramani obosta namsrangjaengahani gimin dingtang dingtang dolrangni badi ka·aniko man·enba Budbar salo, a·dokni Chief Minister Conrad Sangma an·tangan ia ramako re·ange niangaha aro da·o mikkarang waa komiangahaode ia ramako September jamangoni tarina a·bachengatgnok ine jinmana parakataha.
AMPT rama gita re·ruraenggipa manderang bang·a neng·nikanirangko chagrongna nangtokengani gimin dingtang dingtang dolrang aro jolo songdongenggipa manderangba ia ramani bidingo changni chang sorkarina badi ka·doangahachim ine nikna man·a.
Indake ong·engon, Budbar salo a·dokni Chief Minister, Rajabala-ona re·anganio ia ramakoba niangjolaha aro ia ramako ia bilsini September jaonide tarina a·bachengna ka·dongenga ine parakataha.
AMPT ramako tarina gita ia July jani bon·angchibarade tender on·ani kamrangko matchotna ka·dongenga ine iana skang, West Garo Hills a·jani Deputy Commissioner Swapnil Tembe-ba parakatahachim.
Ia km 140 ong·gipa rama Tura-oni a·bachenge Assam a·dokni simao donggipa sign board-o bon·eachim. Ia ramara Assam a·dokni Mankachar, Hatsingimari jolrang baksa Meghalaya a·dokni Tura, Phulbari aro Tikrikilla jolrangko nangdimeatgipa rama ong·e, ia rama gita salantian lakni lak manderang, ia rama gitan songre songgabattokengachim.
Ia ramasa Assam aro Garo Hills-ni manderangna namen mongsonggipa rama ong·genchimoba, ia ramani obosta namen namsrangjahani a·sel, ia rama gita songre songgabatenggipa manderangsan ong·aigija ia ramani samtangtango songdong a·chaenggipa manderangba neng·nikanirangko chagrongna nangtokengachim.
Indake ong·engon, ia ramani mitam bakrangkode chonchone project-rangko tarienba, ramako tariengachim indiba iandake tarianio kamrang name chu·sokna man·jaenga ine Chief Minister parakataha.
“Da·o ia ramako taripilna gita gong kror 50-na baten chamanaha aro DoNER Ministry-ni gitaba gong kror 50-na baten chamataha. Iana tender-ko on·engaha aro tender on·ani kamrang jasani gisepon matchotna nangengaha. Kamrangko September jaonide a·bachengna ka·dongenga,” ine Chief Minister parakataha.
