TURA: South Garo Hills a·jani Gasuapara Land Customs gita e-way bill-ko jakkale Bangladesha·songona koela badingatgipani bidingo Meghalaya High Court sing·doangaha.
Gasuapara gita salangenggipa koelarangni bidingo aro koela salna jakkalenggipa e-way bill-ni bidingo adita salrangna skangsan Gasuapara-ni koela badinggipa saksa Champer M Sangma, Meghalaya High Court-o PIL ka·ahachim aro uandaken uni PIL ka·gipani bidingo Mongolbar salo Meghalaya High Court, hearing-ko dakangenba, koela salna jakkalenggipa e-way bill-ko dontongchina rai on·ataha aro Gasuapara gita banoniko koela salenga uko name sandichina sorkarina ge·etaniko on·angaha.
Raiko Meghalaya High Court-ni Chief Justic Sanjib Banerjee aro Judge W Diengdoh, Mongolbar salo on·angaha.
Gasuapara gita salangenggipa koelarangara badia biap gita a·dokona re·baenga aro banoniko salbaenga, uarangni giminba talataniko on·china High Court, a·dok sorkarina ge·etaniko on·angaha.
Iani bidingo re·baenggipa July 29 tariko hearing-ko daktaina High Court, tik ka·e donangaha.
South Garo Hills a·jani Gasuapara gita niam gri Bangladesh a·songona koela watanio jak donggipa Balwan Soni (Bhama)-ko gipin sakbri manderang baksa, kajina gamchipgija dongengani gimin Assam-ni police-rang, Guwahati songjinmani Basistha joloniko rim·ahachim.
Assam-oniko Gasuapara gita Bangladesh a·songona koela watna gita Bhama-ni ‘Jaymaa’ company-na a·dok sorkari permission-ko on·ahaoba, ia koelarangara Assam-oniko ra·bagipa koelarang ong·jachim indiba Meghalaya a·dokni koela a·damrangoniko bikotgipa koelarangan ong·achim ine ma·sina man·aha.
Assam-oniko Garo Hills gita Bangladesh a·songona koelarangko watna Assam aro Meghalaya a·dok damgnionin bang·bea koela badinggiparang dorgastorangko galahaoba a·dok sorkari, Bhama-ni company-nasan bilko on·aiaha aro uandaken ia mandeni company, niam gri koelarangko bikote Bangladesh a·songona watna a·bachengahachim.
DMR official-rangni parakatani gitade, ia DMR check gate-o koela salgipa truck garirangni re·ruraaniko nirikkina gita CCTV camera-rangkoba donahachim aro da·o dipet Assam-oni koela sale re·baenggipa truck garirangko ia biap gita nikrika dongkujachim.