RESUBELPARA: North Garo Hills a·jani Mendipathar-o National People’s Party (NPP)-ni gitcham membor-rang, United Democratic Party (UDP)-o napangtokaha aro Budbar salo dingtangmancha tom·aniko ong·atangenba, NPP-ni membor-rangko UDP-ona rimchaksoaha.
UDP-o napanggipa bang·bata NPP-ni membor-rangan, da·o re·baenggipa 2023 bilsini Assembly election-na NPP-ni tikitko da·o Mendipathar-ni MLA ong·enggipa Marthon J Sangma-na on·na miksongengani gimin suk ong·jae, NPP-o ong·katgrimenba UDP-o napangskaaha.
“Batanggimin bilsi 30-ni gisepo UDP dolba, dingtang dingtang cholrangchi bilo ong·na man·aha aro mikkangchiba UDP dol Mendipathar-o dal·rorona man·gen ine chinga ma·sienga. Re·baenggipa election-rangoba chinga chu·sokgipa ong·na rake kamko ka·gen,” ine NPP-o ong·kate UDP-o napanggipa membor-rangoni saksa Subhroto G Marak parakataha.
Meghalaya a·dokko man·aoni bilsi 50 gapahaoba maming namroro silroroanirangko nikna man·kujaenga aro iako namdapatna gita uamang krenge kamko ka·gen ineba Marak parakataha.
Marak-ni parakatani gitade, unbaksa sak 500-mangni gita NPP-ni membor-rang, Budbar salo UDP-o napangaha aro mikkangchi gipinrangba apsan ja·kuko de·na miksongenga.
NPP-ni membor-rangko UDP-ona rimchaksona tom·aniko ong·atanio gitcham MLA aro UDP-ni adviser BG Momin aro gipin dilgiparangba dongpaaha.