SHILLONG: Meghalaya a·doko changsataie da·o COVID-19 man·giparang bang·barorotaiengaha aro uandaken Budbar salni gisepon gimik sak 102 manderang, dingtang dingtang biaprango man·dapaha.
Konta 24-ni gisepo COVID-19 man·dapgipa sak 102 manderangko channe da·o Meghalaya a·dok gimiko COVID-19 man·e dongenggiparang sak 358 gapdoangtaiaha.
Konta 24-ni gisepo COVID man·gipa sak 102 manderangoni sak 1-de East Garo Hills-o, sak 34-de East Khasi Hills-o, sak 5-de North Garo Hills-o, sak 12-de Ri Bhoi a·jao, sak 8-de South West Garo Hills-o, sak 36-de West Garo Hills-o aro sak 6-de West Jaintia Hills a·jao ong·a.
Ia salsani gisepo Meghalaya a·dok gimiko sak 16 manderang, COVID-19-oni nampilskana man·aha.
Da·o dipet Meghalaya a·doko COVID-19 man·e sianggiparang gimik sak 1595 gapengaha aro COVID-19-oni nampilgiparangara gimik 92558 gapskaengaha.
Da·o dipet Meghalaya a·dok gimiko COVID-19 man·gipa manderangoni West Garo Hills a·jaon sak 170 gapahani gimin bang·batgipa ong·enga aro uni ja·man East Khasi Hills a·jao sak 103 gape gnigipa ong·skaenga.