Tura MDC-ni farm house-ko am·sandianga, Bernard kate dongenga

Tura: West Garo Hills (WGH) police, Tura MDC Bernard Marak-ni farm house-ko ong·gija kamrangna jakkala ine matnange am·sandiangaha. Edenbari-o donggipa MDC-ni farm house-ko mni Sukrobar atam 6 bajimango sandiangaha. Sonibar salonaba WGH police, dingtang dingtang biaprangkoba sandiangkuaha.
Batanggimin February ja 28 tarik, 2022-o Bernard-ni farm house-o bilsi chu·sokkugija me·chikko kal·akani bidingo me·chik ma·a-paarang FIR-ko segataha. Duko ga·akgipa me·chik an·tangba, uko farm house-ona rimangdrae kal·akaha ine parakaha, ine  Police, Sonibar July 23 tariko koborna u·iataha.
FIR-ko segatani ja·man am·sandie sakgni dos dakgiparangko POCSO-ni niamo pangchake rim·aha.
Bilsi chu·sokkkugijagipani kobor on·anio, Sukrobar salo farmhouse-o special operation ba am·sandianiko dakangaha. Gadang gittamni farm house-o ge 30 room ba kutturirang donga.
“Am·sandiaon police team-rang, bangbango, nokningo aro gari ning·orangba adita sak me·asa aro me·chikrangni chu ringako nikeaha. Mitamrangde ganding-chinding gri dongako nikeaha. Aro sak 68 manderangko sing·sandina rim·aha.”
Indiba mitamrang adalako chol ra·e kate jokaha. Sandigipa dolrang, manager, caretaker aro sakgittam staff-koba rim·aha.
Sandiao bol 36 gari, ge 47 mobile phone, litre 168 baten chuko, jakkalkugija dongipa ge 500 contraceptives aro gipin dingtang dingtang bosturangkoba man·aha. Una agre gong 30,000 tangkako man·aha.
Iarangna agreba police, sakbonga bi·sarangko (sakbri me·asa aro saksa me·chik), dingtang dingtang room ba kuturio teke donako man·aha. Uamangko DCPO-na pakwatataha. Kenjagoke uamang mamingkon aganna man·kujaenga.
Bernard aro unbaksa bakrimgiparang, farmhouse-ko ong·gija kamrangna jakkalenga ine police potichipenga.
Uni gimin Bernard-ni kosako Immoral Traffikcinig (Prevention), Act 1956-ni niamo pangchake mamlako segataha aro sak 73 manderangko police rim·aha.
Indiba dos dakgipa Bernard Marak an·tangde, police-oni kate dongenga.