SHILLONG: Meghalaya a·doko NPP-chi dilenggipa Meghalaya Democratic Alliance (MDA) sorkariko, 2018 bilsio BJP dolsa ja·dil su·e on·aha ine Sonibar salo, Opposition dolni dilgipa aro Meghalaya Pradesh Trinamool Congress (MPTC)-ni dilgipa Mukul Sangma matnangattaiaha.
NPP-chi dilenggipa MDA sorkarini kosako matnange aganangengon, BJP dolchi ja·dil su·ako man·gipa sorkari ong·esa MDA-o bakrimenggipa dolrang, manderangni jegaltokenggipa Citizenship (Amendment) Act (CAA)-na chakpaaniko on·skaaha ine Sangma parakataha.
“Salgro salaram a·dokrang pilakan ku·cholsan ong·e CAA-ko jegaltokahaoba, MDA sorkario bak ong·paenggipa dolrangde CAA-na chakpaaniko on·skaaha. Parliament-o NPP-ni MP maikai NRC-na chakpae aganahachim, an·ching pilakan nikna man·aha. Meghalaya a·dokni manderang iako gualna aro kema ka·na man·jawaha,” ine MPTC-ni dilgipa parakataha.
Sonibar salo ua, Ri Bhoi a·jani Umlaper songona re·ange AITC-na campaign ka·engmiting somoio ia kattarangko aganaha.
Assam aro Meghalaya a·dokni simarango ong·enggipa obostarangko namatna gita dolgnini gisepo soi ka·grikgipa MoU-ko jegalatengon, “2011 bilsion chinga Meghalaya a·dok ning·o ga·akgipa biaprangko man·bapilna gita lekkarangko tarie on·manahachim. Indake ong·genchimoba, Union Home Minister Amit Shah aro Assam-ni Chief Minister Himanta Biswa Sarma re·baani ja·man, MDA sorkari uamangni nokkolrang gita uamangna an·tangtangko bame on·tokaha. Meghalaya a·doko ong·enggipa obosta pilakkon BJP-sa seaha,” ine Sangma aganaha.
MDA sorkarini kamrangko matnange aganangengon, “SSA skigiparang baditana duk mikchiko chakna nangaha an·ching pilakan nikenga. Apsan daken, ASHA worker-rang aro gipin kam ka·giparangba iandakgipa neng·nikanirangko chakna nangtokenga. Iarangna sawa dai nangenga?” ine Opposition MPTC-ni dilgipa sing·doangaha.
Batanggimin bilsibongani gisepo ia sorkari, gital kamrangko ong·katate on·na man·jahani a·sel a·dokni chadamberang bng·batan janggi tangani cholrang dongjae neng·nikanirangko chagrongna nangtokenga ineba Sangma matnangataha.
Meghalaya a·doko TMC-ko manderang ra·chaktokenga ine janapatengon, ia dol mikkangchi gipin dolrangna bate bilakbatgipa ong·gnok ine Sangma parakataha.
“Meghalaya a·doko political power centre damgnisan dongaia aro uan damsa AITC aro damgipinde a·doko dongenggipa gipin dolrang ong·a,” ine Sangma aganaha.
Meghalaya a·doko dingtanganiko ra·bana TMC kang·kare kaenga ineba MPTC-ni dilgipa, ku·rachakaniko on·angaha.
