TURA: Meghalaya a·doko game ge·e cha·enggipa manderangko dakchakna gita a·dok sorkarini ra·gatgipa Farmers Collectivisation for Upscaling Production & Marketing System (FOCUS) program chu·sokgipa ong·engani gimin Meghalaya a·dok gimikni nokdangrangna namgni ong·nagipa FOCUS+ program-ko Bristibar salo a·dokni Chief Minister Conrad K Sangma, North Garo Hills a·jani Resubelpara-o a·bachengate on·angaha.
Ia gital FOCUS+ programara a·dokni nokdangrangna gipin kam ka·e cha·ani cholrangkoba ra·dape gama ge·ani kamrangna on·dapna gita on·enggipa chol ong·a aro ia scheme-ni ning·o nokdang ge·praknan, gong 5000/- tangkako mande saksani bank account-o chipe on·anggen.
Dingtang dingtang gadangrang jekai, NITI Aayog-ni Innovation Index, Starup ecosystem-o nambatgipa, global award aro uandakgipa upattirangko man·ahani gimin Meghalaya a·dokara da·o bilsi 10-ni gisepo nambatgipa dam 10 a·dokrangoni damsa ong·na niksamsoaniko chu·sokatani cholrang dongenga.
Ia FOCUS+ program-ko a·bachengate on·anganio a·dokni Chief Minister Conrad K Sangma, jinmana aganprakangengon, batanggimin bilsibrini gisepo ia sorkari, game ge·e cha·enggiparangna gisik on·e dingtang dingtang kamrango chu·sokgipa ong·na man·aha ine parakangaha.
FOCUS program-ko ra·gatanichi gama ge·ani kamrangk tang·doatna man·aha aro iako pilakan nikna man·enga ineba ua aganaha.
A·dok sorkarini ra·gatgipa dingtang dingtang mission-rang, jekai Lakadong, Piggery, Milk, Spice, Ginger, Aroma aro uandakgipa mission-rangan game ge·e cha·enggipa manderangni bosturangko bazar antirangona sokatna dakchakenga ineba Chief Minister parakataha.
“FOCUS-ara angni ka·tongo nangchapegipa kam gita ong·a maina ia program-chi an·chingni game ge·e cha·enggipa bang·a manderangkon dakchakna man·aha. Da·alo a·bachengatenggipa FOCUS+ program-ba songadam nokadamrango donggipa nokdang ge·antikon tang·doatna dakchakani ong·gen. Ia scheme-ni ning·o a·dokni nokdang ge·antinan gong 5000/- tangkako on·gen aro ian game ge·e cha·enggipa manderangni man·gniko bariatna dakchakani ong·gen,” ine Sangma aganaha.
FOCUS program-ko a·dok sorkari, 2021 bilsini March jao a·bachengatahachim aro ia program-ko ra·gatanichi da·alona kingking sak lak 2.45 game ge·e cha·giparang namgnirangko man·ahachim.
