SHILLONG: Voter ba pu·ongiparangko biming segatanio Election Commission of India (ECI)-ni gita qualifying date ge·briko, chong·motan April-ni 1 tarik, July-ni 1 tarik, October-ni 1 tarik aro January 1 tarikko on·dapahani gimin da·o gital voter-rangko bilsio changbri dake segatna man·gnok ine Sombar salo, Meghalaya a·dokni Chief Electoral Officer (CEO) FR Kharkongor parakataha.
Iana skangde, January 1 tarikkosan qualifying date dake jakkalengani a·sel voter-rangko bilsio changprak dakesan segatna man·engani gimin da·o voter-rangko biming segatna cholrangko on·na gita qualifying date-rangko on·dapaha ine CEO parakataha.
January 1 tarikko qualifying date dakengmiting somoiode January 1 tarikni ja·man bilsi 18 gapgipa chadamberang, electoral roll-rango biming segatna gita bilsi gipinkosa sengna nangrongachim aro uandaken uni gisepo ong·gipa election-rangode bakko ra·pana gita man·rongpajachim.
Indake ong·engon, ia bilsio Electoral Roll-rangko chapa ka·na gita November 9 tarikko tik ka·e donmanahani gimin bilsi 17 gapgimin chadamberangba electoral roll-rangko chapa ka·a dipetde an·tangtangni bimingrangko electoral roll-rango segatsona cholko man·gnok ineba CEO parakataha.
CEO-ni parakatani gitade, manderang jakkaltona gita gital dake taridapgimin form 6,7,8-rangkoba August 1 tarik dipet a·bachengataha. Form 8-koa biming segatanio taridapna nanganirangko taridapna gita donmanaha aro ia chango gital Form 6B-koba, voter card-rangko Aadhar baksa link ka·na gita gital dorgasto galenggiparangna tariaha ine CEO parakataha.
Aadhar nombor-ko on·na man·jagenchimoba, electoral roll-rango biming segataniko jegaljawa aro biming den·galani dongjawa ineba CEO talataniko on·angaha.
Electoral roll-rango biming dongmangimin manderangnaba, Aadhar nombor-rangko ra·na gita Sombar sal dipet dingtangmancha kamko a·bachengataha ineba Kharkongor parakataha.