SHILLONG: Meghalaya a·dokni Garo aro Khasi ku·sikrangkoba Constitution-ni Eighth Schedule-o chapatchina dabitokengon, ia dabianiko Trinamool Congress (TMC) dolsa a·kanggopna jotton ka·skaenga ine Budbar salo National People’s Youth Front (NPYF) matnangataha.
Iani bidingo kobor ra·timgipa manderang baksa agangrikengon, Khasi aro Garo ku·sikrangko Eighth Schedule-o chapatchina dabianiko 1992 bilsio, Manipuri ku·sikko Eighth Schedule-o ra·napani somoion a·bachengahachim indiba da·o ia dabianiko TMC dolsa an·tangtang dakdilenggiparang gita a·kangskaenga ine Budbar salo, NPYF-ni dilgipa aro Rambrai constituency-ni MDC Bajop Pyngrope parakataha.
“Garo aro Khasi ku·sikrangko Constitution-ni Eighth Schedule ning·o ra·gatchina dabianiara da·o adita bilsina skang dabienggipa ong·ja indiba 1992 bilsio Manipuri ku·sikko Eighth Schedule-o chapataonin a·dokni ia minggni ku·sikrangkoba Eighth Schedule-o chapatchina dabiengaha. Ua somoionin a·dokni dingtang dingtang dilgiparang, Garo aro Khasi ku·sikrangko Eighth Schedule-o ra·napchina dabitokengachim,” ine Pyngrope aganaha.
Garo aro Khasi ku·sikrangko Constitution-ni Eighth Schedule-o ra·napaniko nikna sike rakbee kamrangko ka·dilanggipa a·dokni dilgiparangkoba NPYF-ni dilgipa mittelpilangaha.
“Chinga iana Khasi Authors Society aro mongsongbate a·dokni MP sakgni, chong·motan Lok Sabha-ni MP Madam Agatha K Sangma aro Rajya Sabha-ni MP Sir Dr Kharlukhi-koba mittelpilna ska, maina uamangba batanggimin somoirango, Garo aro Khasi ku·sikrangko Eighth Schedule-o ra·napchina gita dabidilenggiparang ong·a. Garo aro Khasi ku·sikrangko Eighth Schedule-o ra·gatchna dabina gita dingtangmancha Assembly-o resolution-ko ra·dilahani gimin aro iani bidingo ma·mong sorkari baksa agangrikengani gimin chinga dingtangmancha MDA sorkariko mittelna ska,” ine Pyngrope parakataha.
Ia ku·sik minggniko Eighth Schedule-o ra·napna gita dabianiara TMC-ni a·selsa ong·aha ine a·kanganikoba ua raken jegalataha.
“Da·o chinga NPYF-ni gita iani bidingo Lok Sabha aro Rajya Sabha damgnion be·en pil·atanikosa nikna sikengaha. Da·o dipet iani bidingo chanchirimanisan ong·engkuani gimin iani bidingo Bill-ko ra·ange Parliament-o pass ka·aniko aro President-ni ra·chakanikosa chinga nangnikenga,” ineba NPYF-ni dilgipa parakataha.
