SHILLONG: Meghalaya sorkarini LP skulrango contract-na skigiparangni biapo qualify ong·gipa skigiparangko kamo ra·ani kamrang matchotmanahani gimin kam bon·atako man·gipa skigiparangkode kamo ra·piltaina nangani katta dongjaha ine Budbar salo, a·dokni Education Minister Lahkmen Rymbui parakataha.
“Skigiparangko kamo ra·na gita pilak nanga kamrang matchotmanaha aro je candidate-rangan chu·sokgipa ong·ahachim, uamangde kamo donatako man·gnok,” ine Rymbui parakataha.
Education Minister-ni parakatani gitade, contractual teacher-rangara pilakan dikdiksana ra·soe kam ka·atgipa skigiparangsan ong·aiachim aro da·o uamangni biapo nanga gita poraiani gadang aro porikkarangko ra·anio chu·sokgipa skigiparangko ra·manahani gimin kam dontongatako man·gipa skigiparangkode kamo ra·piltaiani ong·jaengahachim.
“Contractual teacher-rangkode dikdiksa somoirangnasan kamo ra·chengasan ong·aia aro iako an·ching pilakan ma·sichakna nanga,” ine ua aganaha.
Bilsignina COVID-19 sajinmani a·sel chatro chatrirang class-rangko man·jae neng·nikanirangko man·na nangaha aro da·o skulrango skigiparang chu·ongjae gittamgipa bilsina chatro chatrirang neng·nikanirangko chagrongna nangtokengkua ine Opposition dolni matnangenggipana aganchakaniko on·angengon, badiaba badiaba skulrango skigiparang chu·ongjaenga aro ia skulrangnaba sorkari, jinmana u·iatchenge skigiparangko ra·anggen ine Education Minister parakataha.
Meghalaya a·dokni sorkari LP skulrango contract-na skigiparang, kamtangtango rakkipilchina dabie jingjengatanirangko dakengon, contract-na skigiparangko maming chol on·gija kamoniko ra·gale galahani gimin Umroi-ni AITC MLA George Lyngdoh, sorkarini kamo suk ong·gijaniko parakatahachim.
LP skulrango contract-na skigiparangko 2010 aro 2012 bilsirango kamo rakkiahachim indiba 2018-19 bilsirango MTET porikkako a·bachengatani ja·man contract-o skigiparangni kamko sorkari bon·atahachim ine nikna man·a.