SHILLONG: India sorkari, Meghalaya sorkari aro Hynniewtrep National Liberation Council (HNLC) bobil dolni gisepo agangrikaniko dakna gita HNLC bobil dolni vice chairman, political secretary aro foreign secretary-ko man·chape gimik sakbonga membor-rangko seokaha ine kobor on·aha.
Sorkari baksa agangrikaniko dilna sienggipa HNLC bobil dolni vice chairman Manbhalang Jyrwa, political secretary Aristerwell Thongni aro foreign secretary Phrangkupar Diengdoh baksana uamangni sakgni personal security officer-rang, chong·motan Aiborlem Marbaniang aro Storgy Lyngdoh-ba dongpagen ineba kobor on·aha.
HNLC-ni publicity secretary Sainkupar Nongtraw-ni seachi parakatani gitade, HNLC bobil dol aro dolgnini gisepo agangrikaniko dakdilna seokako man·gipa Home Affairs Ministry-ni AK Mishra, a·dok sorkarioni Peter Dkhar aro HNLC-ni pal agangrikna seokako man·gipa Sadon Blah-ni gisepo ka·donggrikaniko mesokna man·ahani gimin ia HNLC-ni dilgiparangko sorkari baksa agangrikna seokmanaha.
Sorkari baksa agangrikna gita naljokgipa ramarangko HNLC-ni dilgiparangna on·ahani gimin sorkariko mittelpilangengon, sorkari baksa agangrikanio HNLC-ni dilgiparangna naljokaniko on·gen ine Nongtraw, an·tangni sorkario ka·dongchakenganiko parakataha.
Tom·tomaniona re·bapilna gita HNLC bobil dol, sorkari baksa agangrikna skaniko 2004 bilsion a·bachengatahachim indiba ia bilsiosa chu·sokgipa ong·enga ineba HNLC-ni publicity secretary parakataha.
HNLC bobil dol baksa agangrikaniko sorkari ta·raken a·bachengatgen aro pilaknan namgniko ra·bagen ineba ua an·tangni ka·dongchakenganiko parakataha.
