SHILLONG: Tom·tomaniona re·bapilna gita sorkari baksa agangrikanio, Hynniewtrep National Liberation Council (HNLC) bobil dolni dilgiparangna sorkari, nanga gita naljokanirangko on·gen ine Bristibar salo, a·dokni Chief Minister Conrad Sangma ku·rachakaniko on·ataha.
India sorkari, Meghalaya sorkari aro Hynniewtrep National Liberation Council (HNLC) bobil dolni gisepo agangrikaniko dakna gita HNLC bobil dolni vice chairman, political secretary aro foreign secretary-ko man·chape gimik sakbonga membor-rangko seokahachim ine nikna man·a.
Sorkari baksa agangrikaniko dilna sienggipa HNLC bobil dolni vice chairman Manbhalang Jyrwa, political secretary Aristerwell Thongni aro foreign secretary Phrangkupar Diengdoh baksana uamangni sakgni personal security officer-rang, chong·motan Aiborlem Marbaniang aro Storgy Lyngdoh-ba dongpagen ineba HNLC bobil dol parakatahachim.
Indake ong·engon, sorkari baksa tom·tomanina agangrikanio HNLC bobil dolni dilgiparang, naljokaniko on·china nangnikengani gimin sorkari, HNLC-ni dilgiparangna nanga gita naljokaniko on·na tik ka·aha ine Chief Minister parakataha.
Sorkari baksa agangrikna re·baenggipa bobil dolni mande sakantinan naljokaniko on·aniara sorkarini daitoan ong·a ineba Chief Minister parakataha.
“Meghalaya a·doko tom·tomaniko rakkiangna gita sorkarini ja·ku de·anichi HNLC bobil dolko da·o agangrikaniona rimbana man·engaha aro ia kamko chinga bakan a·bachengatna ka·dongenga. Tom·tomanina agangrikanio bobil dolni manderang naljokaniko nangnikengani gimin sorkari, uamangna nanga gita naljokaniko on·anggen,” ine Chief Minister parakataha.