A·songo Monkeypox man·giparang dongahani gimin a·dok sorkari mikraksoa

 

SHILLONG: India a·songoba Monkeypox man·giparang dongahani gimin a·dok sorkari, mikraksona gita a·bachengataha.

“Ian jajrengna nanggipa ong·a aro iani giminsa chinga da·aloba COVID-na porikkarangko ra·engkua aro tika su·anirangkoba nirokengkua. Meghalaya a·doko an·seng baljokaniko rakkina gita chinga pilakni gitan mikrake kamko ka·enga,” ine a·dokni Chief Minister Conrad Sangma parakataha.

Da·o dipet India a·songo monkeypox man·giparang gimik sakchet gapaha ine re·anggipa Mongolbar salosan Union Health Minister Mansukh Mandaviya, Rajya Sabha-o parakatahachim.

Meghalaya a·doko monkeypox-ko champengsona ja·ku de·ani bidingo janapatengon, “Chinga iani bidingo mikrake dongsoenga aro iako champengsona gita mai ja·kurangko de·na nanga, ua pilakkon sorkari dakgen,” ine Chief Minister parakataha.

Monkeypox sabisina tikarangko tarisoani bidingo janapatengon, ia sabisina namgipa tikarangko tarina gita am·sandianirangko dakengkua ine Rajya Sabha-o Union Health Minister parakatahachim.

Monkeypox-ni bidingo manderangna mikrakatanirangko on·ani bidingo janapatskaengon, ia sabisini bidingo mikrakatanirangko on·na sorkari, dingtangmancha task force-ko songaha aro sabisini bidingo mikrakatanirangko on·na gita ja·kurangko de·enga ine Mandaviya parakataha.

Sabisini giproroaniko champengna gita ma·mong sorkari, a·dok sorkarirang baksa nangrime kamko ka·enga ineba ua manderangko kenjagokjachina gita didiataha.

Get real time updates directly on your device, subscribe now.

Comments are closed.