SHILLONG: Meghalaya a·doko koela bikotani aro badingani bidingo ma·mong sorkarina mamingkoba u·iatna skang pangnan name am·sandichengchina gita Nationalist Congress Party (NCP)-ni state president Saleng A Sangma, a·dok sorkariko didiangaha.
Adita salrangna skang, Union Coal, Mines & Parliamentary Affairs Minister Prahlad Joshi-ni Meghalaya a·doko koela badinggipani bidingo Parliament-o kakket ong·jani gimin Sangma, ia kattarangko Meghalaya sorkarina aganaha.
Coal Controller Organisation-oniko kobor man·soani gitade, batanggimin bilsibrini gisepo Meghalaya a·doko koela bikota dongja ine Joshi-ni Rajya Sabha-o agananiara kakket ong·ja ine Sangma parakataha.
“Kamrango olgrokani donga gita nikenga maina Meghalaya a·dokni ramarango an·ching pangnan koela salgipa truck garirangni re·ruraanirangko nikna man·enga,” ine Sangma aganenba, iandake ong·gija koborrangko ma·mong sorkarina on·jachina gita a·dok sorkariko didiataha.
Ma·mong sorkarina on·atenggipa koborrangko name nipiltaina nanga ong·jaode mikkangchi neng·nikanirango chagrongna nangnaba gnang ineba NCP-ni state president aro Gambegre-ni MLA parakataha.
Meghalaya a·doko niam gri koela bikotani aro koela salruraanirangko bang·en nikna man·engani gimin Union Minister-ni Parliament-o agangipa kattarangara kakketmingde ong·esrangjahachim.
