Electricity Amendment Bill-ko pass ka·jachina dabie MeECL-o kam ka·giparang jingjengata

SHILLONG: Da·o ong·atenggipa Parliament-ni Monsoon Session-o Electricity Act-ko taridape, Electricity Amendment Bill 2022-ko pass ka·genchimode Meghalaya a·dokoba bijoli jakkalenggipa manderang neng·nikanirangko chagrongna nangtokgnok ine Sombar salo, Meghalaya Energy Corporation Limited (MeECL)-ni engineer-rang aro gipin kam ka·giparang, ia Bill-ko pass ka·jachina gita kontagnina kamrangko ka·gija Shillong songjinmani Lumjingshai-o jingjengatanirangko dakangaha.

Ia Electricity Amendment Bill-ko da·o ong·atenggipa Parliament-ni Monsoon Session-o ma·mong sorkari pass ka·drana jotton ka·enga ine matnangenba, a·song gimikon National Coordination Committee of Electricity Employees and Engineers (NCCOEEE) jegalanirangko daktokengachim ine nikna man·a.

Indake ong·engon, Meghalaya a·dokoba MeECL-o kam ka·enggipa manderang, Coordination Committee of Registered MeECL (Employees) Associations and Unions (CCORMAU)-ni ning·o, ia Bill-ko jegale sorkarini kosako jingjengatanirangko dakangtokaha.

Jingjengatanirangko dakani ja·man CCORMAU-ni president PK Shullet, kobor ra·timgiparangna talataniko on·angengon, Electricity Amendment Bill 2022-ko pass ka·ahaode private company-rangba a·dokona re·bae MeECL baksa bijolirangko on·na man·gnok aro ian bijoli jakkalenggiparangna nangchakeaniko ra·baani gita ong·gnok ine parakataha.

“Ia Bill-ko indita bilsirangna dontongate donahachim aro ia Bill-ko da·o Monsoon Session-ni somoio pass ka·na gita donsoa dongjahaoba ia bill-ko ma·mong sorkari pass ka·drana jotton ka·enga. Ia Bill-ko pass ka·ahaode bijoli on·gipa private company-rangba register ka·mangmangen a·doko MeECL baksa bijoliko on·pana man·aignok aro unode bijoli jakkalenggiparangsa nangchakeaniko man·gnok,” ine Shullet parakataha.

Shullet-ni parakatani gitade, private company-rangba a·doko bijoliko on·na a·bachengahaode, bijoliko jakkalenggipa nokdangrangoni cholikalgipa nokdangrangde private company-rangoniko ra·na a·bachenggnok aro cholgri ong·pagipa nokdangrangsan MeECL-oniko bijoli ra·e ian a·dokna noksan ong·aniko ra·baani gita ong·gnok.

Mikkangchi uamang NCCOEEE-ni ge·etanio pangchake sorkarini kosako jingjengatanirangko dakangkugen ineba CCORMAU-ni president parakataha.

Get real time updates directly on your device, subscribe now.

Comments are closed.