Indian Army-ni sipairang Pa Togan Nengminjana mande ra·pilskaaniko daka

WILLIAMNAGAR: India a·songni bilsi 75 gapaniko maniani bak gita ‘Freedom Ride’ (Motorcycle Rally)-o bakko ra·enggipa Indian Army Red Horns Division-ni sipairang, Sombar salo East Garo Hills a·jaona sokbaenba, Chisobibra-o tarie dongipa Pa Togan Nengminja Sangma-ni statue ba mangkrongo, una mande ra·pilskaanirangko dakangaha.
India a·songni jakgitelko man·aoni bilsi 75 gapaniko maniani bak gita Indian Army Umroi Brigade, ‘Red Horns Division’-ni ning·o dingtangmancha ‘Freedom Ride – Trans Meghalaya Monsoon Odyssey’ ine bimingko donenba motorcycle-rango re·jomaniko August 3 tarikoni 10 tarikona ong·ate, dingtang dingtang biaprangona re·jomengachim.
Uandaken Sombar salo, ia bike rally-o bak ra·enggipa Indian Army-ni sipairang, East Garo Hills-ona sokbae, Chisobibra-o songe donenggipa Pa Togan Nengminja-ni mangkrongo dingtangmancha una mande ra·pilskaanirangko dakangaha.
Indian Army-ni sipairangko East Garo Hills a·jani Superintendent of Police (SP) BA Sangma aro Additional Deputy Commissioner (ADC) nichaksoaha aro ia program-ko ong·atanio Pa Togan Nengminja Memorial Committee aro Williamnagar-o donggipa Loyola College-ni chatro chatrirangba dongpae bakko ra·angaha.
Ia program-ko ong·atanio Azadi ka Amrit Mahotsav-ni bak gita Indian Army-ni sipairang, dingtangmancha a·songni nisanko ia biapo songe donangaha aro Har Ghar Tiranga campaign-ni bak gita program-o bak ra·gipa manderangna aro chatro chatrirangna a·songni nisanrangkoba suale on·angjolaha.

Get real time updates directly on your device, subscribe now.

Comments are closed.