TURA: North Garo Hills a·jani Bajengdoba aro uni wilwilao niam gri chalaienggipa saw mill ba bol ratani karkanarang baksana niam gri Assam-ona bol palsrukaniko sorkari champengjaengani gimin Bajengdoba jolni NGO-rang, chong·motan Matgrik Do·mesal, AYWO, ADE aro uandakgipa dolrang, an·tangtangan jako ra·e ja·kuko de·skana manchiangaha.
NGO-rangni parakatani gitade, Bajengdoba aro uni wilwilao niam gri bol ratani karkanarangko chalaiengoba aro Garo Hills-ni bol wa·arangko niam gri Assam-ona palsrukatanirang batroroengoba, sorkari department-rang maming ja·kurangko de·jaengani a·sel ia jolrango niam gri bikotgipa saw mill-rang bang·baroroengahachim aro Assam-ona bol wa·a palsrukanirangba batroroengahachim.
“A·songko tangbange aro nitoe rakkina, mande jatni janggi tanganio rongtala balwa aro chiko on·gipa bol-wa·arangko ka·sae rakkina aro simsak nirokna nangengoba Bajengdoba aro uni wilwilao niam gri saw mill-rangko kulie, bolrangko Assam-china badingsrukatna cholko ra·enga aro iarangko darang department-ni gitaba nirok sandianirang dongjaenga,” ine NGO-rang parakatenba, iandake department-ni gita maming champenganirangko dakjaenga ong·ode mikkangchi uamang an·tangtangan saw mill-rangni kosako rakgipa ja·kurangko de·angskagen ine mikrakataniko on·angaha.
“A·chik a·songni ong·signigipa somoirangna simsaksoaniko dakna changni chang didianiko on·ahaoba darang department-ni bil gnanggiparangba tangkachi ku·sikmittu man·ako man·e jrip nie dongenga ine chinga u·ichongmota. Ku·mittipgipa aro tangka gapgipa ku·sikko chinga bil gnange oprakna aro jinmana parak ong·e mesokna chinga re·chakatenga,” ineba NGO-rang parakataha.