Batanggimin jadokni gisepo an·o donggipa me·chikrangni siani 35% komibataha: CM

TURA: Re·anggipa bilsirangko nisusagenchimode batanggimin jadokni gisepo an·o donggipa aro ma·giparangni siani 35 percent-na baten komibataha ine Sukrobar salo, Safe Motherhood Transit Home-ko Rongram block-ni ning·o donggipa Asanang-o kulie on·angani somoio a·dokni Chief Minister Conrad K Sangma parakataha.
Ia transit home-ko Chief Minister-ni Safe Motherhood Scheme (CM-SMS)-ni bak gita sorkari kulie on·angahachim.
Ia Chief Minister’s Safe Motherhood Scheme-ni bidingo talataniko on·angengon, 2020-21 bilsini gisepo gimik sak 248 an·o donggipa ma·giparang siahani gimin State health policy 2021-o ma·giparangni siani batroroenga ine nikenba, an·o donggipa ma·giparangni sianiko komiatna kam ka·anio dakchakaniko on·na gita sorkari ia scheme-ko ra·gataha ine Chief Minister parakataha.
“MOTHER program-ko ra·gatanichi a·dok sorkari, an·o donggipa me·chikrangna simsak nirokaniko mongsonggipa ong·ataha aro safe motherhood scheme-ara health centre-rango an·pakaniko bariatna aro ma·giparangni sianiko komiatna miksonge ra·gatgipa scheme ong·a,” ine Sangma aganaha.
Chief Minister-ni parakatani gitade, ia scheme-ni ning·o mongsonggipa mingbri bakrang donga aro uan skanggipa, Transit Home-rangko kulie bilgribatgipa ma·giparangna simsak nirokaniko on·an baksana ma·giparangna cha·anirangko aro uamangni bi·sarangna biapko on·ani, gnigipao – joltangni entrepreneur-ko bak ong·ate ma·giparangna aro uamangni nokdangna re·a doaniko on·ani, gittamgipa – segiparangko aro nokdangni manderangko ma·gipa baksa re·chapchina aro dongpachina didie sakprako gong 1000 tangkarangko on·ani, aro bon·kamgipao – PHC ge·prakni ning·on bilsio changprak dake nambatgipa songna award-rangko on·ani ong·enga.
Meghalaya a·dok gimiko dam 80 PHC-rang, transit home-rangko kulimanaha ine talatangengon, dam 84 PHC-rangde garirangna tik ka·manaha aro JSY, JSSK gita dakgipa program-rangko nangrimate, ia schemepna gong kror 36 tangkarangko chame donmanaha ine Chief Minister parakataha.
2020-21 bilsio a·doko bi·sa bakgitchakrangni siani 20 point ong·enga aro ia apsan bilsion a·songni gita 28 point ong·ahani gimin a·dok sorkari, bi·sa bakgitchakrangni sianiko komiatna jotton ka·enga ineba Chief Minister parakataha.