Tura: Namen misilbegipa obostao, mijal salni bakko, bilsi chu·onggija scooty salgipa, skul bus baksa chatinggrike, an·tangni janggiko gimaatna gita nangaha.
Jolo donggiprangni aganani gitade, bilsi 13 ong·gipa scooty-ko ta·rake sala baksana, kisango sakgni manderangkoba gadoataha aro chatinggrike a·sel ong·anio uamangba, be·eni dingtang dingtang bakrango saknaa man·aha. A·sel ong·anio janggiko a·damon gimatgipa, NGH-ni Dalbing songni, bilsi 13 ong·gipa Tengbath Ch. Marak ong·a.
Indake, sakgni saknaa mna·giparangara, Thapa Darengchi-ni Dabo T Sangma aro Koksi Rongtang-ni Artush Sangma ong·a. Sana bananiko dakna gita, uamangko ta·rake, Apollo Hospital, Guwahati-ona ra·angaha. Uamang baksa, skul-ni authority-rang re·angpaaha. A·sel ong·anio ga·akgipa sakantian, skul re·gipa bi·sarang ong·achim.
A·sel ong·anio ga·akgiparang sakgittaman, North Garo Hills district-oni re·bapilengachim. Independence Day-ko manina gita tarisamsoenggipa skul bi·sarangko salna re·baenggipa bus-osa uamang cha·gake a·sel ong·aha.
Police-rangni aganani gitade, a·sel ong·ani 1:30 PM-o, Songsak, East Garo Hills-o ong·aha. Bilsi chu·onggija aro chaka samgnigipa garirangko salanirango, helmet-rangko gangija salaniara namen namja aro maibai a·sel ong·na nanggenchimode, maming chelchakanikoba man·ja.
Bang·a, ma·gipa pagiparangan, chonchongipa aro bilsi chu·onggijagipa bi·sarangna, garirangko bree on·a baksa jakkalna gita on·enga. Bilsi chu·onggija salaniko nike rim·e singsandianiko dakgenchimode, bang·a ma·gipa pagiparangan, skulrangona an·tangtang dilbana man·jaani gimin ra·e on·a, ine pasike aganronga.
”Ian namen namjabegipa kam ong·a aro an·tangtangni dedrangko namgijagipa biapo donatani ong·a. Ia bi·sarango driving licence-ba dongja aro uamang gari salna gitaba bilsi chu·ongkuja. Indakgipa somoi garirangko on·gipa ma·gipa pagiparangko kema ka·na gita nenga. Gimiknan somoi donga aro ma·gipa pagiparang an·tangtangni dakna nanganiko dakgija indake tolna gita nangja,” ine a·sel ong·ani ja·mano, chugipa gadangni police officer saksa aganangaha.
Officer-ni aganani gitade, department-o dingtang dingtang nangchongmotgipa kamrang dongani a·sel salantide am·sandina gita neng·nika aro mangsongbate ningtugipa songrangona aro district-ni dingtang dingtang biaprangonade re·e am·sandina gita nenga.
”A·sel ong·ani obostarangko masiani ja·manosa, a·sel ong·aniko champengna man·aba dongachim, ine chinga chanchia. Indiba pangnajolnade chinga ua biaprango ong·kamna gita man·ja. Ma·gipa pagipa aro simsakgipa manderangba niroke kamrangko ka·na nanggen,” ine EGH-ni officer aganangaha.
Bus, scooty chatingrikanio, bilsi 13 ong·gipa sia, sakgni saknaa man·a
Date:
Share post:
