B Mahal-ni a·arangko pale gala ine matnangenba jinma tom·bimonganiko ong·ata

TURA: West aro North Garo Hills a·jani ning·o ga·akgipa B-Mahal-ni a·arangko a·dok sorkarini Meghalaya Industrial Development Corporation (MIDC) aro Meghalaya Tourism Development Corporation (MTDC)-na Garo Hills Autonomous District Council (GHADC)-ni Executive Committee pale galaha ine matnanganirangko nikna man·engon, ia a·arangko jolni manderang aro songni nokmarang baksa agangrikchenggija sorkarina on·ahani gimin jegalna gita Save B-Mahal Committee, re·anggipa August 13 tariko, Pedaldoba songni kal·chakramo jinma tom·bimonganiko ong·atangaha.

Ia tom·bimonganio Garo Hills gimikni dingtang dingtang dolrang, jekai Niksamso A·chik Society (NAS), Matgrik Domesal, All India Garo Union (AIGU), Garoland State Movement Committee (GSMC), A·chik Youth Welfare Organisation (AYWO), Garo Students Union (GSU), Federation of Khasi Jaintia & Garo People (FKJGP) aro uandakgipa dingtang dingtang dolrang baksana A·king Nokma aro dingtang dingtang songni manderangba bakko ra·angtokaha.

Ia tom·bimonganiko ong·atanio dingtang dingtang dolni dilgiparang, jinmana aganprakangengon, Garo Hills-ni a·arangara Tribal manderangni a·arangsa ong·genchimoba, ia a·arangko District Council-ni dilgiparang, songni nokni dilgiparang aro songni manderang baksa agangrikchenggija sorkarini kamna pale galaha ine matnangatenba, ia a·arangko Garo Hills-ni manderangna on·pilna nangchongmota ine dabiangtokaha.

Ia tom·bimonganiko ong·atanio Save B-Mahal Committee-ni chairman Rimjen Ch Sangma-ba jinmana aganprakangengon, B-Mahal-ni a·arangko manderang baksa agangrikchenggija MIDC aro MTDC-na pale galaha ine GHADC-ni CEM Albinush Mara karo MDC Rakesh Sangma-ko matnangatenba, iani bidingo nipiltaie songni nokni manderangni namgnina ja·kuko de·china a·dokni Chief Minister Conrad K Sangma-ko didiataha.

“Iana skangba, B-Mahal-ni a·arangko gama ge·aniko dakna Israel-ni manderangna palna miksonganiko aro ia biapo Meghalaya Battalion camp kulina miksonganiko B-Mahal-o songdongenggipa manderang jegaltokahachim indiba da·o ia apsan biapniko GHADC-ni dilgiparang, sorkarina pale cha·na miksongtaiengaha. Chingni kobor man·soani gitade, B-Mahal-ni ning·o ga·akgipa hectare 5000-mangni gita a·arangko NPP-chi dilenggipa GHADC-ni EC, MIDC aro MTDC-na palataha aro iana GHADC-ni EC gong kror 58 tangkarangko a·dok sorkarioniko man·soaha,” ine Save B-Mahal-ni chairman parakatenba, ia a·arangara Garo Hills-o songdongenggipa manderangni a·asa ong·a aro iako GHADC, a·dok sorkarina pale cha·na bil dongja ine parakataha.

“Supreme Court-ni dongimin niam gitade, GHADC-ara Garo Hills-ni a·arangko nirokgipasan ong·aia aro nokgipa ong·ja. Indide maikai a·a nokgiparang baksa agangrikchenggija GHADC-ni dilgiparang, ia a·arangko sorkarina pale cha·na man·a?” ineba Save B-Mahal-ni chairman sing·doataha.

Get real time updates directly on your device, subscribe now.

Comments are closed.