SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·otgalgipani bidingo inquiry dakani report-ko ta·raken parakchina gita uni skanggipa siani bilsiko gisik ra·e maniani salo, dingtang dingtang dolrang aro uni nokdangni manderangba sorkario dabiangtokaha.
Cheristerfield-ni sianiko gisik ra·na gita dingtangmancha uni noko tom·aniko ong·atanio sianggipa mandeni jonggipa Granary Starfield Thangkhiew, jinmana aganprakengon, uni adatangko police-rangni so·otgalani bidingo judicial inquiry dakani report-ko sorkari ta·raken jinmana parakna nanga ine aganaha.
Ia inquiry report-ko re·baenggipa September 9 tarikon jinmana parakgen ine a·dokni Deputy Chief Minister Prestone Tynsong an·tangan ku·rachakaniko on·manahani gimin ia report-ko ku·chakgimin salni gisepo jinmana parakjagenchimode uni nokdang aro dingtang dingtang dolrang, jrip nie dongjawa ineba Granary parakataha.
“Chinga chingni adatangna kakket bichalko nangnikengani gimin ia judicial inquiry-ni report-ko jinmana parakchina dabienga. Cheristerfield-ko so·otanio jak donggipa manderang pilaknan nanga gita sastirangko on·chinaba chinga dabienga,” ine Cheristerfield sagini jonggipa aganaha.
Meghalaya a·doko aro mongsongbate Shillong songjinmao, iani a·sel maming so·sojengjeng ong·anirang dongjana gita a·dok sorkari, report-ko ta·raken jinmana parakna nanga ineba ua aganaha.
September 9 tarikni gisepo ia inquiry report-ko jinmana parakjagenchimode ong·nanggija a·selrang ong·ani chol donga ineba Granary mikrakataniko on·angaha.
“Chinga sorkarini mol·molaniko knachake September 9 tarikona senge dongna tik ka·aha indiba sorkari ku·rachakatangko chu·sokatja ong·ode chinga National Human Rights Commission, High Court aro Supreme Court-onaba re·angnaba gnang,” ine Granary aganaha.
Re·anggipa Sonibar salo, HNLC-ni gitcham general secretary Cheristerfield Thangkhiew-ni siani sal ong·ani gimin dingtang dingtang dolrang, Mawlai jolo songdongenggipa manderang aro sianggipa Thangkhiew-ni nokdang baksa dingtangmancha una mande ra·pilskaaniko dakangaha aro uni gopramonaba re·ange mande ra·pilskaaniko dakangahachim.
HNLC bobil dolni gitcham general secretary Cheristerfield Thangkhiew-ko police-rangni so·otgalgipani bidingo Justice (Retd) T Vaiphei-ni judicial inquiry dakani report-ko antichetmangna skangan on·manahaoba ia report-ko a·dok sorkari, jinmana parakkujaengachim.
Re·anggipa 2021 bilsini August 13 tariko HNLC-ni gitcham dilgipako police-rangni so·ote galani ja·man Shillong songjinmao ding·chaoanirang ong·katahani gimin ia a·selni bidingo judicial inquiry-ko dakchina Meghalaya sorkari ge·etangahachim.
HNLC-ni gitcham general secretary Cheristerfield Thangkhiew-ko 2021 bilsini August 13 tarik pringwalo, uni dongchakenggipa nokona re·ange police-rang so·otahachim ine nikna man·a.
Police-rangni u·iatani gitade, re·anggipa bilsio Shillong songjinmani Laitumkhrah-o IED bomako gopretanio jak dongani gimin police-rang uko rim·nasa uni nokona re·angahachim indiba ua police-rangko churichi chadrappangpilna jotton ka·ahani giminsa police-rang uko gochakna nangahachim.
Indake ong·genchimoba police-rangni agangipa kattarangko dingtang dingtang dolrang bebera·na man·jae, iani bidingo inquiry-ko dakchina sorkario dabiskaahachim.