TURA: Garo Hills-o nambate bijoli on·china dabianiko aro MeECL-o kam ka·giparangko rakkidapchina dabianiko sorkarini knachakjaengani gimin Zikku Balgra Marak-chi dilenggipa GSU-CEC, re·baenggipa August 24 tarikoni 26 tarikona kingking salgittamna Garo Hills gimikon MeECL office-rangko picketing ka·na tik ka·angaha ine u·iataha.
Iani bidingo GSU-CEC-ni dilgiparang, re·anggipa August 17 tariko tom·e chanchirimenba, August 19 tariko West Garo Hills a·jani Deputy Commissioner-na sedoataha ineba u·iataha.
GSU-CEC-ni president Zikku Balgra Marak-ni parakatani gitade, Garo Hills-na bijoliko nambate on·china, Power department-o mikkang niteani kam ka·giparangko rakkichina, Garo Hills-na MeECL-o chu·onga gita kam ka·giparangko rakkichina, Garo Hills-o kam ka·giparangko Khasi Hills-ona ra·jitangjachina, MeECL-ko chalainio mikkang niteani gri ong·china, Shillong-o donggipa MeECL-ni head office-o A·chikrangkoba kamo rakkichina dabian baksana 2020 aro 2021 bilsirango Khasi Hills-o bang·en kam ka·giparangko rakkiahani gimin Garo Hills-oba kam ka·giparangko rakkidapchina dabie batanggimin somoirangoba uamang, dingtang dingtang dolrang baksa nangrime jingjengatanirangko dakahachim indiba uamangni dabienggipani bidingo sorkari, da·alonan maming aganchakanirangko on·kujaengani gimin MeECL office-ko salgittamna picketing ka·angtaina tik ka·angaha.
Ia salgittamna office picketing ka·ani ja·manoba Power department-oni ba sorkarioni maming aganchakanirangko on·kujagenchimode, re·baenggipa August 29 tarikoni September 3 tarikona, wal 9:00 bajioni pring 5:00 bajiona night road blockade ba walni somoio rama champengataniko Garo Hills gimikon dakangskagen ineba GSU-ni president parakataha.
