Phulbario bijoli sijringe jolni manderang neng·nikako man·tokenga

Tura: Phulbari aro sepangjolgipa jolrango bijoli sirongani gimin jolni manderang ka·onanganiko parakattokaha. Jeni a·sel jolni manderang neng·nikako man·tokenga.
Koborni gitade jolni manderang bijoli sirongani gimin adita changnan badi ka·ahachim, bijoli dongjani a·sel manderang ding·a baksana tunapjaenga.
“Bijoli dongjae, ding·a chakna nange ding·ol-gramchie be·en-an·gilrang ka·kitako man·enga. Chingoni mitam businessman-rang business-tangko chalaina salantion gong 1500 tangkako koros ka·enga. Bijoli dongjani a·sel chingna loss ba gimaaniko sawa gamgen? Bijoli department, chingna bijoliko on·na chu·sokjaenga, uamang kamtangko dakna-ka·na man·jani gimin kratchana nangpila, ine Phulbari-ni saksa Ashraful minggipa aganaha.
Dadenggre subdivision-oni bang·arangba uamangni jolo bijoli sijringani gimin neng·nikanirangko man·e badi ka·tokenga, indiba maming namgniko man·jaenga.
“Salprako konta 4 somoinasan bijoliko man·ode maini gimin anga jagimikna tangkako gamgen? A·doktangon suk ong·e dongna man·ja, ian sorkarini simsakgijani a·sel ong·a. Jolni MLA, ia mamlako nirokatna nangenga, ine jolni mande saksa Peter Sangma aganskaha.
Iana skangba jolni manderang salprakon konta 20 somoina bijoli siako chagrongna nange neng·nikako man·tokaha. Unbaksana bijolini voltage-ba bilongen komia, mombatiko so·on bulb bate teng·batpila. Jagimikna iandakgipa obostako chagrongna nangaha, apsan daken da·oba iandakgipa obostako chagrongenga.
Bijoli sijringani gimin ka·onange GSU-Phulbari regiona unit, mni Sukrobar salo FEDCO (electricity supply) office-ona re·ange niaha, unon office-o saksamangba staff-rangni kam ka·gija indin roako nike jagokpilaha. Indiba jenten uamang saksa official-ko gronge agangrikna cholko man·aha.
“Minggipin jolni manderang grid-ko a·bachengna adita changan mol·molahachim indiba da·onan maming namgniko man·jaenga. Uni gimin jolni manderang power minister aro Chief Minister-ko ia mamlako nirokatchina mol·molangaha.”
Indake ong·engon jolni manderang bijoli sijringani gimin ka·onange rally ka·angna tik ka·aha.