SHILLONG: Assam aro Meghalaya a·dokni simarango ong·enggipa golmalrangko namatna ja·ku de·anio, bangki dongenggipa damdok jolrangko namatna gita a·dok damgnini chief minister-rang, re·anggipa Robibar salo Guwahati songjinmao tom·e agangrikaniko a·bachengatangahaon, a·dok damgnini gisepo meligrikna man·jaenggipa dam 12 biaprangoni skanggipa damdok biaprangkon namatna man·kujaengachim ine a·dokni Opposition Trinamool Congress (TMC) suk ong·gijaniko parakatenba, ia gnigipa bakko namatna agangrikanirangko dakna skang, skanggipa bakrangkon namatchengchina dabiangaha.
Skanggipa damdok biaprangko namatchenggija da·o bangki dongkuenggipa damdok biaprangko namatna resolution ra·anirangko Opposition dol maming dakeba ra·chakna man·jawa ine janapatengon, iani bidingo TMC dol, da·o ong·atna sienggipa Assembly-ni Autumn Session-o NPP-chi dilenggipa MDA sorkariko sing·dona tarisoenga aro skanggipa damdok biaprangni bidingo manderang ra·chakna man·kujaskalde uamang iani bidingo jegalaniko dontongjawa ine TMC-ni MLA George B Lyngdoh parakataha.
“Skanggipa bako Meghalaya a·dokni a·kanggimin 50 percent a·arangkon Assam-o napatahaode maikai da·o gnigipa bakko namatna sorkarini ja·ku de·aniko chinga ra·chakna man·gen?” ine Lyngdoh sing·doataha.
Skanggipa bakni damdok biaprangni bidingo soi ka·grikgipa MoU-ko den·galpile, manderangni nangnikani gita kamrangko gital dake a·bachengatjaskalde dolgni sorkarirangni, gnigipa bakna agangrikaniko ra·chakna man·jawa ineba TMC-ni dilgipa parakataha.
A·dok damgnini simarangko bak dakna gita survey ka·enggipani bidingo janapatengon, ian simarango songdongenggipa manderangni nangnikaniko knachakgija sorkarini dakdraaniko mesokanisa ong·enga ine Lyngdoh parakataha.
“Skanggipa bakko Assam-sa cheangaha aro da·o gnigipa bakba apsan daken ong·angenga gita nikenga. A·dok damgnini simako bak dakna gita Survey of India-na bilko on·aniara, simarango ong·enga obostarangko sorkarini niatna gisik nanggijaniko mesokanisa ong·enga,” ine TMC-ni MLA aganaha.
