SHILLONG: Tura-ni MDC aro BJP Meghalaya-ni state vice president Bernard N Marak-ni kosako ka·gipa case-rangko kachari kema ka·tokahaode re·baenggipa 2023 bilsini Assembly election-o South Tura constituency-oni susagen ine a·doko BJP-ni dilgiparang ka·dongsotokenga.
BJP-ni dilgipa AL Hek-ni parakatani gitade, Marak-ni case-rangko kachari kema ka·tokgenchimode re·baenggipa Assembly election-o a·dokni Chief Minister Conrad K Sangma-ni South Tura constituency-o susaanggen.
“Da·o dipet ia mamla kacharini jakosa ong·kuengpiti aro ia case-ko kacharini bon·ataniko chinga senge dongkuenga,” ine Hek aganaha.
Rimpu Bagan-ni mamlao Marak-ko rim·aniara, election-na skang uko politics-ni gita kal·akanisa ong·aha ineba ua, iani bidingo jakgitele am·sandianiko dakchina dabiangtaiaha.
Ia sal somoirango, Trinamool Congress (TMC)-ko man·chape dingtang dingtang dolrangni dilgiparangko rime katna jotton ka·enggipani gimin janapatskaengon, ukoba TMC aro gipin dolrango napchina didiahachim indiba ua BJP dolon dongangkugen ine Hek parakataha.
Re·baenggipa Assembly election-o BJP dol, dam 10-oni dam 15 seat-rangko chena ka·dongenga ine janapatengon, ia ka·donganiko chu·sokgipa ong·atna gitade, a·doko BJP dolko bilakbatatna aro kragipa candidate-rangko man·na nanggen ine BJP MLA parakataha.
“Chinga Shillong jillani mitam constituency-rango, Jaintia Hills-o damgittam seat-rangko aro Garo Hills-ona mitam seat-rangko chena ka·dongenga,” ine Hek aganaha.
