TURA: Deficit skulrango skigiparangna sorkarini ku·chakgimin 50 percent arrear baksana Deatch-cum-Retirement Gratuity-ko on·kujaengani gimin re·baenggipa September-ni 5 tariko Skigiparangni salo, an·tangtangni suk ong·gijaniko mesokna gita badge gisimko gane mesokangna gita tik ka·aha ine Garo Hills Deficit School Teachers & Employees Association (GHDSTEA) parakataha.
GHDSTEA-ni secretary JMM Marak-ni parakatani gitade, re·anggipa 2021 bilsini November 15 tariko a·dokni gitcham Chief Secretary Rebecca Suchiang baksa aro uni ja·man 2022 bilsini July 1 tariko gitcham Additional Chief Secretary DP Wahlang baksa tom·e chanchirimani somoio, skigiparangna bangki 50 percent arrear baksana Death-cum-Retirement Gratuity (DCRG)-ko on·na ku·rachakahachim indiba da·alona ia man·gnirangko deficit skulrango skigiparangna on·kujaengachim.
“Iani bidingo GHDSTEA-ni executive committee, re·anggipa August 18 tariko tom·e chanchirimangenba, skigiparangni man·gnirangko sorkarini ru·utate roengani gimin suk ong·gijaniko mesokna gita re·baenggipa September 5 tariko a·song gimikon Skigiparangni Salko maniani somoio chinga badge gisimko gane jingjengatna tik ka·angaha,” ine GHDSTEA-ni secretary parakataha.
Iani ja·manoba skigiparangna 50 percent arrear-ko aro DCRG-ko sorkari on·kujagenchimode skigiparang jingjengatanirangko dakangkuna draatako man·gen ineba GHDSTEA-ni secretary mikrakataniko on·angaha.