TURA: Chadamberangna Drugs aro churangko jakkalani namgijani, HIV/AIDS sabisi aro Teenage Pregnancy ba bilsi sokgija an·o dongani namgijanirangko talate on·an baksana Career Guidance ba mikkangchi an·tangtangna janggi tangani cholrangko dake ra·ani bidingo agan-talate on·na gita August-ni 22 aro 23 tarikrango Meghalaya AIDS Control Society (MACS) baksana Internal Quality Assurance Cell (IQAC), Red Ribbon Club, National Service Scheme (NSS) aro Don Bosco College Alumni Association nangrimenba, awareness program-ko A·kimdora (Sampalgre)-o donggipa St James UP School aro Jangga-o donggipa Mother Angeles Secondary School-o ong·atangaha.
Ia awareness program-ko ong·atanio West Garo Hills a·jani MCH Officer Dr Ivonne M Sangma, bilsi sokgija an·o dongani namgijanirangko agan-talate on·angengon, maini a·sel a·doko bang·bea me·chik bi·sarangan bilsi sokgija an·o dongengachim aro iachi uamangna mai nangchakeaniko ra·baengachim, uarangni gimin agan-talate on·angaha. Bilsi sokgija an·o donganiko maikai champengna man·gen, uarangni giminba Dr Sangma, ia program-o agan-talate on·angaha.
Ia program-ko ong·atanio Mother Angeles Secondary School-ni Principal John Marak, sam aro churangko jakkalanichi maikai mandena namgijaniko ra·bana man·a aro maikai iandakgipa bosturangoni chel·e dongna nanga, uarangni bidingo chadamberangna agan-talate on·angskaaha.
Ia program-o skie on·giparangko Tura Don Bosco College-ni Principal Fr Bivan Rodriques Mukhim rimchaksoangengon, ia program-ko Meghalaya AIDS Control Society aro Tura Don Bosco College-ni gisepo bakrimanichi ong·atna man·aha ine parakangaha.
