TURA: Adita salrangna skang, rim·ako man·gipa Tura-ni MDC aro BJP Meghalaya-ni state vice president Bernard N Marak-ko COVID-19-na porikka ra·e nianio positive ong·ahani gimin uni bidingo hearing dakaniko ra·doataha ine kobor on·aha.
Bernard-ni hearing-ko Mongolbar salo dakani ong·achim indiba ua COVID-19 positive ong·ahani gimin ua nampilkujaskal uni bidingo hearing dakaniko kachari ra·doataha ineba kobor on·aha.
Tura Edenbari-o donggipa ‘Rimpu Bagan’-o me·a me·chikrangko ong·gija dake rona on·enga ine matnangako man·gipa Tura-ni MDC aro BJP Meghalaya-ni state vice president Bernard Rimpu N Marak-ko UP a·doko rim·ani ja·man July jani 29 tariko skanggipa changna kachario mikkangpaatahachim.
An·tangko bame on·china u·iatani ja·manoba katchipe dongahani gimin aro ia bilsini February jao me·chik bi·sa saksako uni bagano drae til·ekgipani bidingo District Sessions Court-ni gita uni kosako non-bailable arrest warrant-ko on·ahani gimin police-rang, uko rim·china gita a·song gimikni police station-rangna u·iataniko on·atani ja·man Tura-ni BJP MDC aro BJP-ni Meghalaya state vice president-ko Uttar Pradesh a·dokni Hapur a·jaoniko police-rang rim·na man·ahachim.
Marak-ko rim·ani ja·man kachario mikkangpaaton, uko police-rangni ning·o donna on·kuchina kachario bi·ahani gimin Tura-ni MDC-ko police-rangni ning·o donchina kachari rai on·ataha aro uandaken uko police-rangni ning·o donani mijal Mongolbar salo sal 26 gapahachim.
