TURA: Adita salrangna skang, South Garo Hills a·jani Nongalbibra jolo donggipa Nengbrek Gittimo me·chikma saksani bijoli nanga man·e sianiara FEDCO official-rangni aro kam ka·giparangni simsakgijani a·selsa ong·aha ine Nongalbibra-ni Garo Students Union (GSU) aro Federation of Khasi, Jaintia & Garo People (FKJGP) dolrang matnangatenba, ia a·selni bidingo FEDCO-ni sub divisional manager (SDM)-ni kosako rakgipa ja·kurangko de·china South Garo Hills a·jani Deputy Commissioner aro a·dok sorkariko didiataha.
Koborko on·ani gitade, re·anggipa August-ni 18 tariko Suritha N Sangma minggipa me·chikma saksa Nengbrek songni buringo kam ka·engmiting somoio bilakbegipa bijoli silitingo ga·dapmanenba siangna gita nangahachim.
Indake ong·engon, ia jolrango bijoliko nirokenggipa FEDCO company aro ia company-ni SDM, bijoli line-rangko simsak nirokanirang dongjaengani a·selsa iandakgipa a·selrangko chagrongna nangenga ine dolgni NGO-rang parakataha.
“Nongalbibra-oni Darang Boldak-ona ra·anggipa 11 KV main line namen onbeani a·sel a·arango nangpilenga aro ian buringo donggipa matburingrangnasan ong·aigija mandenaba kenchakna nangani ong·engachim. Ia main line-ni onbeaniko nikgenchimoba FEDCO company aro company-ni SDM ia main line-ko taridape on·na gisik nangjahani a·selsa adita salrangna skang me·chikma saksa janggitangko gimaatna nangaha,” ine Nongalbibra-ni GSU aro FKJGP dolrang parakataha.
Ia biapo iandakgipa a·sel ong·ani ian skanggipa chang ong·ja aro batanggimin changrangoba ia jolrango iandakgipa a·selrangko chagrongna nangahaoba FEDCO company-ni official-rang, maming ja·kurangko de·samsona gisik nangjaha ineba dolgni NGO-rang parakataha.
FEDCO company-o kam ka·giparangba chu·ongja aro dingtang dingtang nangchongmotgipa ostrorangba chu·onga gita dongja ine janapatengon, adita salrangna skang Nengbrek Gittimo ong·anggipa a·selko jakgitele am·sandiatchina aro Meghalaya sorkarini FEDCO baksa soi ka·grikgipa MoU-ko den·galpilchina gita Nongalbibra-ni GSU aro FKJGP dolrang dabiangaha.
