SHILLONG: Meghalaya a·doko petrol aro diesel-ni kajinarangna gital tik ka·gimin damko Budbar salo a·dokni Cabinet ra·chakangaha.
Cabinet tom·a matchotani ja·mano kobor ra·timgiparangna talataniko on·angengon, da·o dipet petrol-ni kajina 13.5% ba gong 11.00 ong·engon ia kajinako litre-prako 13.5% ba gong 12.50-ona bariataha ine a·dokni Taxation Minister James K Sangma parakataha.
Minister-ni parakatani gitade, diesel-ni kajina da·o dipet litre-prako 5% ba gong 4.00 ong·skaengon, ia kajinako 5% ba gong 5.50-ona bariatskaaha.
Byrnihat-o da·o petrol-ni retail sale price (RSP) gong 95.10 ong·engahani gimin Assam aro Meghalaya a·dokni gisepo gong 1.92-ni dingtanggrikani donggnok ineba Taxation Minister parakataha.
“Petrol-ko da·o Byrnihat-o gong 95.10 aro Shillong-o gong 96.83 ong·gnok aro diesel-koba Byrnihat-o gong 83.50 aro Shillong-o gong 84.72 ong·engahani gimin diesel-o dingtanggrikanide Byrnihat-o gong 1.44 aro Shillong-o 0.22 ong·gnok,” ine Sangma parakataha.
Meghalaya a·doko da·o petrol aro diesel-ni kajinarangko bariataoba a·song gimiko komibatgipa ong·engkua ineba Taxation Minister parakataha.
Sangma-ni parakatani gitade, adita salrangna skang Assam sorkari, petrol aro diesel-ni kajinarangko bariatahani gimin Meghalaya a·dokoba kajinarangko bariatna nangaha.
Assam-o petrol aro diesel-ni damrangko bariata changantian Meghalaya sorkariba, petrol aro diesel-ni damrangko apsan ong·e rakkina gita taridapna nangao ga·aka ine ua parakataha.