TURA: A·chikrangoni skanggipa political dilgipa Pa Sonaram R Sangma-ni chang 106-gipa siani salko August-ni 27 tariko Sonaram R Sangma Memorial Trust Society-ni gita Bakrapur songo maniangtaigen.
Pa Sonaram Sangma-ni siani salko pangna bilsian Garo Students Union (GSU) aro Sonaram R Sangma Memorial Trust Society nangrimenba, Bakrapur songo manidilrongenga aro uandaken ia changoba uni siani salko dingtangmancha program-ko ong·atenba apsan biapon manienga ine u·iataha.
Pa Sonaram R Sangma A·chikrangni gisepo skanggipa politics-ni kamko ka·dilchenggipa aro an·chi pari nika gri British sorkarini kosako dakgrikdilchenggipa ong·achim. Ua da·ororoni manderang gita skia man·begipa mande ong·pajaoba namen ka·donggipa aro an·tangni bebera·anio mogija kim·kimgipa ong·achim. Ua A·chik jatko gipin jatrangni sinchep dokchep dakanirangko nike A·chik jatko chel·chakna gita an·tangko on·kange kamko ka·aha aro uandaken ua 1899 bilsimango jatna aro a·songtangna kamko ka·chakataha.
Pa Sonaram Sangma, 1916 bilsini August 27 tariko, be·enni gita saaniko man·e Bakrapur songon a·gilsakko wate re·angaha.
Indake ong·engon, Pa Sonaram Sangma-ni siani salko gisik ra·e manianiona a·kitikbrionin dingtang dingtang A·chik dolrang, chatro chatrirang, dingtang dingtang NGO-ni dilgiparang aro jatko-a·songko dilgiparangba re·bae bakko ra·anggen ine Society-ni dilgiparang u·iataha.