SHILLONG: Meghalaya Chamber of Commerce (MCC)-ni bimingo Tura jillao dokkan dakenggipa aro bading chiwale cha·enggipa manderangoniko tangka gildrae ra·anichi cha dokkanrango man·gipa cha·anirangko man·chape me·su samjak, bolam bite, do·chi aro ma·manti bosturangni damrangko niam gri rakbatatahani a·sel manderang neng·nikanirangko chagrongna nangtokengon, iandake niam gri dam tang·doaniko am·sandienba manderangni namgnina ja·kurangko de·ahani gimin a·dokni Chief Minister Conrad K Sangma, West Garo Hills a·jani district administration aro Tura-ni police-rangko social media gita mittelpilataha.
Manderangni neng·nikanirangko namatna gita ta·raken ja·kurangko de·ahani gimin district administration aro Tura-ni police-rangna chakpaaniko parakatengon, manderangni cha·ani ringani aro ma·manti nangchongmotgipa bosturangni damko rakbatatani a·sel manderang neng·nikanirangko chagrongna nangtokengahani giminsa district administration aro police-rang, ia ja·kuko de·aha ine Chief Minister parakataha.
Tura-o manderangni cha·ani ringani aro ma·manti bosturangni dam tang·doengani gimin badi ka·anirangko man·e police-rang, am·sandianirangko dakon, ‘Rimpu Bagan’-ni bidingo rim·ako man·gipa Tura-ni BJP MDC Bernard N Marak-ni ge·etanichi gital bikottaigipa Meghalaya Chamber of Commerce-ni membor-rangsa damrangko rakbatatanio jak donga ine police aro district administration, ma·sina man·ahachim.
Iani bidingo police-rang, MCC-ni adita sak membor-rangni kosako FIR ka·doangahachim aro police-rangni FIR-o janapani gitade, MCC-ni membor-rang, Tura jillao cha·ani aro ma·manti bostuni damrangko rakbatatenba, dokkan dakenggipa aro bading chiwale cha·enggipa manderangoniko an·tangtangna tangka paisarangko gile ra·skaengachim.
Indake ong·engon, a·doko songdongenggipa manderangni man·gniko cha·bokna man·jana gita, manderangna nangchongmotgipa cha·ani ringanirangko on·anian sorkarini mongsonggipa daito ong·a ine Chief Minister parakataha.
