SHILLONG: Meghalaya a·doko India aro Bangladesh a·songni simarangko kapengani da·o 80 percent-ni gitade matchotaha indiba ia jolrango biaprang namen ga·nangjani a·sel chu·gimikko matchotsrangna man·kujaenga ine Sombar salo BSF official-rang parakataha.
BSF Meghalaya Frontier-ni Inspector General (IG) Inderjit Singh Rana-ni parakatani gitade, Meghalaya a·dok ning·o ga·akgipa Indo-Bangla simarangoni 80 percent-kode fencing kaani ba kapengani matchotmanaha indiba ia jolrango simarang bang·batan a·bri aro diltugipa buringrangosa ong·ani gimin sima kaani kamrangko ka·anio bang·a neng·nikanirangko man·na nangengachim.
A·song damgnini simarango kolgipurang bang·en dongkuengani gimin niam gri bading chiwale cha·giparang, ia biaprang gitan badinge cha·na gita cholrangko ra·enga ineba Rana parakataha.
Meghalaya a·dokni badiaba badiaba simarango songdongenggipa manderang, zero line-o aro Meghalaya a·dokni 150 yard ning·osa simarangko kachina nangniktokenba, sima kaani kamrangko jegaltokahachim ineba nikna man·a.
Adita salrangna skangsan, South Garo Hills a·jani Rongara sima jolo kam ka·enggipa Border Security Force (BSF) sipairangko, Bangladesh a·songoni dolsa niam gri badinggipa manderang chadrapahachim ine nikna man·a.
Iani bidingo janapatengon, niam gri badingenggipa manderangko champengna gita BSF dol, dingtangmancha niamrangko ra·gataha aro iani bidingo FIR-koba ka·aha ine BSF Meghalaya Frontier-ni IG parakataha.
Indake ong·engon, India a·songni jakgitelaniko man·aoni bilsi 75 gapaniko maniani bak gita BSF dol, July jaoni December jaona dingtang dingtang program-rangko HQ Eastern Command, BSF Kolkata-ni ning·o ong·atenga ine BSF official parakataha.
BSF official-ni parakatani gitade, BSF dolni tarisogimin program-ni bak gita September 1 tarikoni September 16 tarikona, National Integration-ni gimin manderangna u·iatna gita Shillong-oni Delhi-ona bike rally-ko ong·atenga aro ia bike rally-ko Meghalaya a·dokni DGP Dr Lajja Ram Bishnoi, Shillong-o donggipa Sector HQ BSF-oni a·bachengate on·anggen.