TURA: Garo Hills-o donggipa MePDCL office-rangko picketing ka·an baksana August 29 tarikoni September 3 tarikona Night Road Blockade-ko badiaba badiaba dolrang ong·atenga ine koborko man·soahani gimin iandake sorkari office-rango kam ka·anirangko champengna man·jana gita, walni somoirango re·ruraanirangko champengna man·jana gita aro badiaba dolrangni gol·dik, ro·ong ba uandakgipa silchidare ra·bitaniko champengna gita West Garo Hills a·jani District Administration, dingtangmancha Section 144 CrPC-ko ra·gatangaha ine u·iataha.
Ia niamko West Garo Hills a·ja gimikon September 3 tarikona ja·rikanggen ine u·iatengon, ia niam police ba uandake chel·chakanirangko on·enggipa sipai dolrangnade nangchakeani dongjawa ine District Magistrate parakataha.
Re·baenggipa September 3 tarikona kingking, West Garo Hills a·jani ning·o donggipa pilak petrol pump-rangon, petrol ba diesel-rangko jerrycan-rango ba botolrangko paljachina gitaba District Magistrate u·iataha.
Garage-rango ba workshop-rango skatang tyre-rangko a·palrango gale donaigija garage ning·o chipe donchina gitaba ua u·iataha.
Dingtang dingtang department-ni officer-rangkoba, department-ni garirangko naljokao donchina aro office-rango chowkidar-rangko mikrake dongchina ge·etchina gitaba District Magistrate u·iataha.
Garo Hills-o nambate bijoliko on·china aro Garo Hills-o donggipa MeECL office-rango chu·onga gita kam ka·giparangko rakkidapchina dabie Garo Hills-ni dingtang dingtang NGO-rang, batanggimin somoirangonin Garo Hills-ni dingtang dingtang biaprango donggipa MeECL office-rangko kam ka·na on·gija jingjengatengachim ine nikna man·a.