Me·chik saksani bijoli nange siani bidingo maming ja·kurangko de·jaenganina NGO-rang jingjengata

TURA: South Garo Hills a·jani Nongalbibra jolo donggipa Nengbrek Gittimo official-rangni simsakgijani a·sel me·chik saksa bijoli nanga man·e siangna nangaha ine Nongalbibra-ni Garo Students Union (GSU) aro Federation of Khasi, Jaintia & Garo People (FKJGP) dolrang matnangenba, iani bidingo official-rangni kosako maming ja·kurangko de·jaengani gimin aro sianggipa me·chikni nokdangna maming dakchakanirangko on·jaengani gimin Mongolbar saloni a·bachenge salgnina asonge jingjengataniko dakangaha.
Adita salrangna skang, South Garo Hills a·jani Nongalbibra jolo donggipa Nengbrek Gittimo me·chikma saksani bijoli nanga man·e sianiara FEDCO official-rangni aro kam ka·giparangni simsakgijani a·selsa ong·aha ine Nongalbibra-ni GSU aro FKJGP dolrang matnangatenba, ia a·selni bidingo FEDCO-ni sub divisional manager (SDM)-ni kosako rakgipa ja·kurangko de·china South Garo Hills a·jani Deputy Commissioner aro a·dok sorkariko didiatahachim ine nikna man·a.
Koborko on·ani gitade, re·anggipa August-ni 18 tariko Suritha N Sangma minggipa me·chikma saksa Nengbrek songni buringo kam ka·engmiting somoio bilakbegipa bijoli silitingo ga·dapmanenba siangna gita nangahachim.
Indake ong·engon, ia jolrango bijoliko nirokenggipa FEDCO company aro ia company-ni SDM, bijoli line-rangko simsak nirokanirang dongjaengani a·selsa iandakgipa a·selrangko chagrongna nangenga ine dolgni NGO-rang parakatenba, ia official-rangni kosako rakgipa ja·kurangko de·china dabiangtokahachim.
Ia official-rangni kosako rakgipa ja·kurangko de·china dabiangani ja·manoba da·alonan maming aganchakanirangko on·kujaenga ine dolgni NGO-rang suk ong·gijaniko parakatenba, salgnina asonge jingjengataniko dakangaha.
Mikkangchiba iani bidingo a·dok sorkari aro South Garo Hills a·jani district administration maming aganchakanirangko on·jagenchimode aro maming ja·kurangko de·jagenchimode bilakbate jingjengatanirangko dakanggen ineba dolgni NGO-rang, mikrakataniko on·angaha.