TURA: Be·enni gita cholgri ong·gipa manderangna Inc-Preneurship-ni brigipa session (Entreprenership program)-ko mijal Bristibar salo, Tura-ni Prime Hub-o ong·atangaha aro ia apsan program-kon East Khasi Hills, Ri Bhoi aro Jowai-oba ong·atangaha.
Ia program-ko Shillong-ni Barefoot Trust, Meghalaya Prime Hub baksa nangrime ong·atangaha aro ia program-ko ong·atanio Barefoot Trust-ni Managing Trustee Bibhudutta Sahu, ia program-ni gimin jinmana talate on·angengon, ian be·enni gita cholgri ong·gipa manderang baksa agangrikani program-sa ong·ani gimin uamang an·tangtangni neng·nikanirangko aro an·tangtangni kam ka·na skanirangko ia program-o talate on·na man·gen ine parakangaha. Bading chiwalani ba je kamrangkoba ka·genchimoba kan·dikgipa ramachide chu·sokgipa ong·na man·jawa ine janapatengon, bading chiwalani kamrangko chu·sokgipa ong·atna gitade somoiko aro mandeni bimchipaniko nangchongmota ine Sahu aganaha.
Ia program-ko ong·atanio West Garo Hills a·jani SVEEP Icon for Persons with Disabilities (PWDs) Darlington Ch Sangma-ba dongpae bakko ra·angengon, program-o bak ra·giparangna agan-ku·pattianirangko on·angenba, ia program-o skie on·gipa kattarangko A·chikkuchi agan-talate on·angskaaha.
Ia program-ko ong·atanio dongpae jinmana aganprakanggipa gipin manderangara, Barefoot Trust-ni Program Coordinator Sweet C Syiemiong, Tura MIE-ni Assistant Manager Bryan SR Marak aro gipinrang ong·a.