TURA: Bristibar salo, Tura-ni gitcham MP aro Lok Sabha-ni gitcham aganchalaigipa Purno A Sangma sagini chang 75-gipa atchiani salko National People’s Party (NPP)-ni Tura-ni District Auditorium-o maniangaha.
Ia salko manianio NPP-ni national president aro Meghalaya a·dokni Chief Minister Conrad Sangma, Tura-ni MP Agatha Sangma aro NPP-ni dingtang dingtang dilgiparangba dongpae bakko ra·angtokaha.
Ia salko manianio a·dokni Chief Minister aro Purno A Sangma sagini depante Conrad K Sangma, jinmana aganprakangengon, uni pagipa Purno Sangma sagiara, salgro salaramni manderangna aro a·songni dingtang dingtang biaprango donggipa Tribal-rangna an·tangko on·kange kam ka·gipa mande ong·ani gimin ia salara Tribal-rangna gisik ra·ani sal ong·enga ine parakangaha.
NPP dolko bikotani gimin janapangengon, salgro salaram jolni manderangna aro a·songni gipin Tribal-rangna ku·rangko on·na cholko on·na gitasa PA Sangma sagi, NPP dolko bikotaha ine Conrad aganaha.
“A·songna aro jatna kamko re·mikkanga intalan PA Sangma sagi, dingtangmancha salgro salaram jolrango donggipa manderangna an·tangko on·kange kamko ka·aha aro uni mingnamgipa kamrang pangnan gimajawaha,” ine NPP-ni national president aganaha.
Conrad-ni aganani gitade, manderangni namgnina kamko ka·anian skanggipa daito ong·a ine PA Sangma sagi, an·tangni janggi tanganio dakmesokangaha aro uni ia miksonganion da·o NPP dolba manderangni namgnina kamrangko ka·enga.
Salgro salaram jolna ku·rangko on·enggipa NPP dolni da·o national party-rangoni dolsa ong·paenganiara PA Sangma sagini niksamsogipa jumangan ong·achim ineba ua aganaha.
Ia tom·anio bakko ra·na skang, NPP-ni national president aro a·dokni Chief Minister Conrad K Sangma, Tura-ni MP Agatha K Sangma aro NPP-ni gipin dilgiparang baksa Tura-ni Cherangre-o donggipa PA Sangma-ni gopramona re·ange dingtangmancha una mande ra·pilskaaniko dakangaha.
