TURA: Bilsi dok ong·gipa bi·sarangna, dal·drobaenggipa me·chikrangna, an·o donggipa aro sok kanenggipa ma·giparangna an·seng baljokaniko on·na September jagimin manienggipa Poshan Maah ba Nutrition Month-ko Garo Hills-ni dingtang dingtang biaprango a·bachengataha.
North Garo Hills a·jao ia Poshan Maah-ko Sukrobar salo, North Garo Hills a·jani Deputy Commissioner RP Marak, Bajengdoba-o donggipa Berubari Anganwadi Centre-o a·bachengate on·angaha aro ia program-ko a·bachengate on·anganio ua jinmana aganprakangengon, dingtang dingtang program-rangko ra·gate on·anichi manderangni janggi tangani gadangko tang·doatna kam ka·engani gimin sorkariko mittelpilangaha.
Ia Poshan Maah-ko maniani miksonganiara, bi·sarangna aro me·chikrangna an·seng baljokaniko on·e a·jani pilak songrango donggipa nokdang ge·antinan namgipa cha·ani ringanirangko cha·ani bidingo ma·siate on·anian ong·enga ineba Marak aganaha.
A·dok sorkarini ra·gatdape on·gipa FOCUS+ program-ni bidingo talataniko on·angengon, ia program-ni ning·o producer group-ni member-rangna tangka paisarangko dakchake on·anichi manderangni janggi tanganiko dingtangatna man·gen ine Marak parakataha.
Sorkarini ra·gate on·enggipa program-rango an·tangtangni bimingrangko segate, ia program-rangni namgnirangko ra·china gitaba ua a·jani manderangko didiangaha.
Ia Poshan Maah-ko a·bachengate on·anganio dingtangmancha me·chik aro bi·sarangko porikka ra·e niangan baksana Anganwadi worker-rangn Nutri kit aro me·su bitchilrangko suale on·angaha aro bite nanggipa bol chararangkoba ge·angaha.
Indake ong·engon, ia Poshan Maah ba National Nutrition Month-ko Tura-ni Central Agriculture University (CAU)-ni ning·o donggipa College of Community Science-oba a·bachengataha aro ia program-ko a·bachengatanio West Garo Hills a·jani District Medical & Health Officer Dr Bijay Deb Berma, mongsonggipa sokgipa ong·e bakko ra·angaha.
