SHILLONG: Meghalaya a·doko niam gri koela bikotanirang chu·gimik bon·aha inede aganna man·jawa ine Mongolbar salo, a·dokni Home Minister Lahkmen Rymbui ku·rachakataha.
A·doko niam gri koela bikotani chu·gimik bon·srangaha ong·kuja ine janapatengon, “Meghalaya a·doko niam gri koela bikotaniko NGT-ni champengatna skang, koela badinganiara manderangna bang·en tangka paisarangko man·na dakchakani ong·achim aro a·dokni bang·a manderangan koela badinganio pangchakgiparang ong·achim,” ine Home Minister talataniko on·angaha.
A·doko niam gri koela bikotaniko champengatani ja·man manderang janggi tangani cholrang dongjae niamrangko pe·na a·bachengtokaha ineba Rymbui parakataha.
“2014 bilsio rang·gitik a·doko niam gri koela bikotaniko champengatani ja·man bang·a manderangan janggi tangani cholrang dongjae, an·tangtangna bading chiwalanirangko dake cha·anio niamrangko gelna a·bachengtokaha,” ine ua aganaha.
A·doko changni chang niam gri koela bikotanirangko rim·a man·engani gimin janapatengon, West Khasi Hills a·jao aro a·dokni dingtang dingtang koela a·damrango niam gri koelarangko bikotan baksana koelarangko salruratokenga ine Home Minister, ku·rachake aganaha.
“A·doko niam gri koela bikotani dongjaha ine chinga a·kangna man·jawa maina manderang niamrangko pe·e koelarangko badingenga. Indiba police aro songsalni daitoan niam gri koela bikotaniko champengani ong·enga,” ine Rymbui parakataha.
Iandake niam gri koela badinggiparangni gimin kobor on·giparangna boksisrangko on·skana gita sorkari, 2020 bilsio dingtangmancha scheme-ko ra·gatahachim ine janapatengon, boksisrangko on·ani donggenchimoba darangba niam gri koela badingenggipani bidingo police-rangna koborrangko on·tokjaha ine Home Minister parakataha.