TURA: Be·enni gita cholgri ong·gipa me·chik saksa, jean ku·agananio neng·nikaniko man·gipa ong·achim, ia me·chikko Rimpu Bagan mamlao rim·ani ja·man, niam gri pattoko donchae roahani gimin police-rangni kosako, All Meghalaya Association of Persons with Disabilities (AMAPD)-na badi ka·doangaha.
Be·enni gita cholgri ong·gipa mandeko rim·aniara a·songni niam bidiko be·enni gita cholgri ong·gipa manderangna on·gimin bilko pe·ani gita ong·aha ine police-rangni kosako AMAPD-na badi ka·doangaha.
Ia me·chikni badi ka·doangani gitade, uko Rimpu Bagan-oniko rim·ani ja·man, Tura Women police station-ni me·chik police saksa, una dakchakani pal batesa uko chonnike roaha aro uni ku·aganna man·gijako daksningesa roskaahachim. Uko Tura jail-ona watatani ja·man, jail-o dongtimenggipa warden-rangoni saksa uko kragija dake satkapaha aro uko noti dari dakgipa me·chik ineba kragija dake chonnike roaha ineba ia me·chik, AMAPD-na badi ka·doanggipao parakataha.
Indian Constitution 1949-ni Article 22 (2)-ni ning·o on·gimin niamni gimin janapatengon, ‘Ia niam gitade, rim·a man·gipa manderangko konta 24-ni gisepon sepangbatgipa magistrate-ona rimange mesokna nangachim indiba Rimpu Bagan-o rim·a man·gipa manderangkode konta 24-ni gisepo magistrate-ni mikkangona rimangskajaha,” ine be·enni gita cholgri ong·gipa me·chik parakataha.
Uko rim·anio police-rang bang·en niamrangko pe·aha ineba ua, police-rangni kosako nanga gita ja·kurangko de·china AMAPD-ko didiataha.