TURA: West Garo Hills a·jao skanggipa changna Block Development Officer (BDO)-rangni tom·bimonganiko Sombar salo, DRDA Conference Hall-o ong·atangaha aro ia tom·bimonganio West Garo Hills a·jani Deputy Commissioner Swapnil Tembe, ADC aro DRDA-ni Project Director Dolrich BG Momin, dingtang dingtang block-ni BDO-rang aro MGNREGA-ni additional programme officer (APO)-rangba bakko ra·angaha.
Ia tom·bimonganiko ong·atanio West Garo Hills a·jani Deputy Commissioner Swapnil Tembe, BDO-rangni gamchatgipa ong·ani aro daitorangni bidingo talate on·angengon, songadam nokadamrango namroro silroroaniko ra·bana gita sorkarini ra·gate on·gipa dingtang dingtang scheme-rang, jekai MGNREGS, PMAY, NSAP aro uandakgipa dingtang dingtang scheme aro program-rangko chu·sokatanio BDO-rangan mongsonggipa kamko ka·giparang ong·a ine parakangaha.
Ia tom·anio, West Garo Hills a·jani ning·o donggipa damsni block-ni BDO-rang, an·tangtangni chu·sokatenggipa kamrangni bidingo aro an·tangtangni chagrongna nangenggipa dingtang dingtang neng·nikanirangko agan-talate on·angskaaha.
Bon·kamao, West Garo Hills a·jani Additional Deputy Commissioner aro DRDA-ni Project Director Dolrich BG Momin, BDO-rangna agan-ku·pattiani aro didiani kattarangko aganangskaaha.
