TURA: Garo Hills-ni dingtang dingtang biaprango skul nokrang namjae, poraienggipa chatro chatrirang aro skie on·enggipa manderang neng·nikanirangko chagrongna nangtokengon, North Garo Hills a·jaoba apsan daken skul nokrang namjae chatro chatrirang neng·nikanirangko chagrongna nangtokenga ine kobor on·aha.
Kobor on·timgiparangni u·iatani gitade, North Garo Hills a·jani Dainadubi jolo skul damgni, maming dakchakanirangko man·jaengani a·sel skul nokrang obosta namgijaniko nikna man·engahachim.
Ia skul damgnioni skanggipa skulara Bangsi Apal Government LP skul ong·a, jeon sakbri skigiparang donggenchimoba skul nokrang dongjani a·sel poraienggipa chatro chatrirangde 27-mangsan dongaia ine kobor on·timgiparang parakataha. Ia skulko 1926 bilsio a·bachengatahachim indiba ia skulna sorkarini gita maming dakchakanirang dongjani a·sel ia skulni obosta da·o namsrangjaengaha ineba kobor on·timgiparang parakataha.
“Ia skulni mongsonggipa nokko 2006 bilsio pe·aha indiba chinga an·tangtangan tangka paisarangko gilchimonge ia skulko taripilahachim. Indiba 2014 bilsini September jao mikka balwarang ta·rakangani somoio ia skul nokko chu·gimik pe·angsrangaha aro ua somoionin ia skul nokko taripile on·a dongkujaenga,” ine skulni skigiparang parakataha.
Ia skul nokko tarie on·china changni chang skigiparang aro dingtang dingtang NGO-rangba, North Garo Hills a·jani Education department-na u·iatahachim indiba da·alonan ia skulna maming dakchakanirang sokbakujaenga ineba kobor on·timgiparang parakataha.
Gnigipa skulara ia apsan biaponin Togan Memorial UP skul ong·a aro ia skul nokko 1999 bilsio rikahaoba ia skul nokko mikka balwa ta·rakani somoio pe·angaha ine kobor on·timgiparang parakataha.
Kobor on·timgiparangni u·iatani gitade, ia skul nokko pe·angani ja·man, skulni skigiparang, skul nokko rikpiltaina tangka paisarangko bi·atahachim indiba ia skulara government aided skulsa ong·ani gimin tangka paisarangko on·na man·jawa ine skigiparangna aganchakaniko on·atskaaiahachim.
Indake ong·engon, ia skulna sorkarini gita maming dakchake on·anirangko man·jae skigiparang, an·tangtangan an·tangtangni dormaharangoniko on·gile aro manderangoniko gilame ia skul nokko aditade rikpana man·aha ine kobor on·timgiparang parakataha.
Ia skul nokko rikna gita Mendipathar-ni MLA Marthon Sangma-ba nokkingrangko on·e dakchakanirangko on·paaha ine kobor on·timgiparang parakataha.
