SHILLONG: Lekka porani gita Performance Grading Index (PGI)-ni tosusaanio Meghalaya a·dok komibatgipa a·dokrangoni damsa ong·engani gimin Sukrobar salo, Mawsynram-ni Opposition MLA HM Shangpliang, suk ong·gijaniko parakataha.
Meghalaya a·dokni skulrango ong·enggipa obostarangni gimin songbadrango segipani bidingo a·dokni Education Minister Lahkmen Rymbui-na janape on·angengon, Meghalaya a·doko gnigipa changna PGI ranking-o komibatgipa ong·aha ine Shangpliang parakataha.
Meghalaya a·dokni dingtang dingtang a·jarango skulrango poraienggipa chatro chatrirangni ong·kate donganirang batroroengani gimin an·tangni suk ong·gijaniko parakatengon, skulrango poraigipa chatro chatrirangni ong·katani South West Garo Hills-o 44.86 percent aro South Garo Hills a·jao 37.14 percent ong·aha ine TMC MLA parakataha.
Shangpliang-ni parakatani gitade, drop out percentage-o North Garo Hills a·jaoba 34.09 percent aro South West Khasi Hills a·jaoba 30.86 percent ong·skaengachim.
Skul nokrangko taridape on·na nangengani giminba Assembly-o TMC-ni MLA, a·dok sorkarina gisik ra·ataniko on·angaha.
Songbado seaniko toe janapatengon, Garo Hills-o skigipa saksa dormaharangko man·ani ja·manoba bilsi gittamna skulchi re·chipgija dongaha ine Shangpliang, iandakgipa skigiparangni kosako rakgipa ja·kurangko de·china didiangaha.
Ia chanchirimanirangna a·dokni Education Minister Lahkmen Rymbui aganchakaniko on·angskaengon, skulrangko chalaianio Meghalaya a·dok aditan tang·dona gita man·engaha ine parakatskaaha.
PGI-ni score on·ani gitade, 2017-18 bilsirango Meghalaya a·dok 584 mark-rangko, 2018-19 bilsirango 610 mark-rangko aro 2019-20 bilsirango 648 mark-rangko man·aha ine Education Minister parakataha.
2022-23 bilsiode Meghalaya a·dok 700-na baten mark-rangko man·gen ineba ua parakataha.
Meghalaya a·dok dam 1000-na baten skulrangko taridapgen ine janapatengon, 80 percent-na komigija sorkari skulrangko taridapna gita sorkari tangka paisarangko chame on·gen ine Rymbui parakataha.