SHILLONG: Bilsi 2018-oni bilsi 2022-ona dingtang dingtang department-rangna sanction ka·gipa post ba vacancy-rangko gapatani bidingo Opposition Trinamool Congress-ni sing·anina, Chief Minister Conrad K Sangma, aganchakna chu·sokjaha.
TMC-ni MLA George B Lyngdoh, Sukrobar salo autumn session-ni bon·kamgipa salo question hour-ni somoio, sorkari department-rango mande ra·ani bidingo sing·aha, jena CM, kragipa aganchakaniko on·na man·jaha. ‘Iani bidingo mamingko talchenggija aganchakna man·jawa’ ine CM-ni aganchakanina TMC legislator suk ong·gijako parakaha.
Indake ong·engon Zenith Sangma, sorkariko uamangni sing·anirangna aganchakna man·jani gimin, “sorkari, gimik dakgipa sing·arangko House-o aganchakna man·na nanga,” ine aganaha.
“Ia mamlao mamingko tale u·igijade ba chu·onga gia data donggijade aganchakna man·jawa, maina sandiani gri aganchakaniara, dilsretaona soknaba donga, ine CM, warachake aganskaha. Indake ge 63 directorates, ge 60 departments, ge 12 DC offices, ge 6 sub-division offices, ge 49 C&RD blocks aro Guwahati, Kolkata, Delhi, Mumbai aro gipinrango Meghalaya House-rang donga ine CM, aganangaha.
Zenith, sorkariko a·dokni chadamberangni kamgri ong·e dongengani gimin matnangaha, indiba CM, ‘MPSC-ni gita ge 1,040 post-rangko gapatna advertisement-ko on·aha aro Central Recruitment Board-ni gita ge 1,015 post-rangna advertisement-ko on·aha ine talataha.
Iarangni gisepon HM Shangpliang, Secretariat Administration Department-ni ge 77 casual peon post-rangko gapatna application-ko on·ani gimin sing·angskaha. Bilsi 2012-ona dingtang dingtang department-rangna sak 123 peon-rangko ra·aha, indakomangba maina peon-ni casual post-rangko on·skaha ine sing·aha.
Indake ia sing·aninaba CM, aganchakna gita somoiko bi·aha.
Get real time updates directly on your device, subscribe now.
Comments are closed.